Bil landa på taket i Steinstø
Ein bil køyrde av vegen og landa på taket i Steinstø i ettermiddag.
Klokka 17.17 fekk naudetatane melding om at ein bil hadde køyrt av vegen og hamna på taket i Steinstø i Fyksesund. Ulukka skjedde på det smale vegpartiet på Fyksesund 7 mellom den tidlegare daglegvarebutikken i Steinstø og avkøyrsla til anlegget til Hardanger akvasenter.
Ambulanse og brannmannskap rykte ut til staden. Berre éin bil var involvert i ulukka, og det var éin person i bilen. Personen er køyrd til kontroll hjå lokal legevakt, opplyser operasjonssentralen i Vest politidistrikt.
Ifølgje lensmann Terje Sperrevik i Kvam og Samnanger lensmannsdistrikt har vitne forklara at ulukka hende i samband med ei forbikøyring. Vedkomande som køyrde forbi på veg mot Ålvik, har truleg mista kontrollen der vegen vart smalare. Bilen ser ut til å ha kome ut i grøfta på venstre side av vegen før han kryssa vegbanen og forsvann ut av vegen på den høgre sida.
Bilen hadde falle nokre meter ned frå fylkesveg 7 og landa i ein hage, kloss i eit bustadhus. Ein stolpe var knekt ulukka. Bergingsbilen var på veg då HF var på staden om lag klokka 18.
