Rekordtidleg sesong godt i gang på Oma

Jordbærsesongen fekk ein pangstart for Anne Lise Breievne i år. Medan haustinga vanlegvis ikkje startar for fullt før rundt jonsok, har ein på Oma-garden plukka jordbær sidan slutten av mai.

– Me er prisgjevne vêret, og sesongen har til no vore ein fryd. Den solfylte våren har gjort bæra verkeleg store, fine og gode, fortel Breievne.

Sola har fått draghjelp i arbeidet med å modna bæra. I ein sårbar periode tidleg i vår vart det lagt fiberduk over åkrane for å skjerma plantene. Desse vart liggjande lenger enn planlagt, då fleire veker med sterk vind gjorde det vanskeleg å få dei fjerna.

Breitt utval

I tillegg til jordbær har garden alt frå bringebær og solbær til jordskokk, poteter og grønkål. Desse er klare for hausting seinare på sommaren og i haust.

Hønene syter for at også egg er å få kjøpt. Bæra vert selde i ulike former. Ein kan kjøpa dei ferdigplukka, sylta, safta eller plukka dei rett frå åkeren.

Det gode liv på landet

Garden på Oma har høyrt til familien i over 350 år. Breievne har sjølv hatt han som feriestad gjennom oppveksten, og overtok i 2007. Etter kvart fann ho ut at ho ikkje berre ville bu. Ho ville gjera noko ut av staden. Med bakgrunn som lærar byrja ho på Hjeltnes gartnarskule i Ulvik. Heime planta ho samstundes meir og meir. Årets sesong er den tredje i rekka.

Ugraskampen

Kampen mot ugraset er tøff, men Breievne føretrekker å kvitta seg med det med andre metodar enn kjemiske stoff.

– I tillegg til å luka, brukar me biofilm på åkrane for å stoppa ugraset. Denne vert til slutt til jord og reduserer avfallet i stor grad, fortel Breievne.

Tre jordbærplukkarar var å sjå i åkrane tysdag. På det meste er dei seks og fleire av dei kjem eins ærend til Noreg for å plukka jordbær i sesongen. Omabæra er også å finna på Thon Hotel Sandven og gardsbutikken i Øystese. Fleire gongar i veka kan dei kjøpast på kaien i Norheimsund. Om ein likevel vil ta turen til garden på Oma, kan ein få helsa på kaninar, høner og grisar. Grisane grev opp røter og ugras i gamle åkrar, i tillegg til å gjødsla.

Jordbærglade kundar

På ein vanleg dag på Oma kan det fort verte selt tre hundre jordbærkorger.

– Folk er veldig interesserte. Dei har tydeleg lengta etter dei norske bæra, seier Breievne.

Dei siste åra har ferske bær vorte lettare å få tak i i butikkane heile året. Breievne meiner det verkar positivt inn på den norske drifta.

– Dette fører til at folk er vande til å bruka meir bær. Framfor å lagra bæra kjøper dei gjerne for å kunne eta litt heile tida, fortel ho.

Eline Sandnes Fosseredaksjon@hf.no