Vil utvida opningstida

Turistinformasjonen i Jondal bør opna tidlegare.

Det meiner rådmannen i Jondal. Ho føreslår å løyva 74.000 kroner til å utvida opningstida. Utvidinga inneber at kontoret vert ope frå 15. mai. I fjor opna det 15. juni. Det vert stengt, som før, 20. august.

Hovudutval for teknisk og næring drøftar saka måndag føremiddag.

På eige initiativ

Politikarane har ikkje tinga saka. Rådmannen grunngjev henne med at reiseliv er eit satsingsområde for kommunen, og at utvida sesong og på lang sikt heilårsaktivitet er eit ”uttala mål frå både administrativt/politisk nivå og utøvarar i næringa”.

Sidan 2008 har Folgefonn Ecoturism AS (FE) drive turistinformasjonen med eit kommunalt tilskot som i fjor var 173.000 kroner.

Tolkar lova i eigen favør

Normalt skal kommunen konkurranseutsetja tenester som kostar så mykje. Rådmannen meiner lov om offentlege innkjøp ikkje stiller eit absolutt krav om konkurranse. Ho meiner samarbeidet mellom kommunen og FE på fleire måtar ber preg av eit offentleg-privat samarbeid enn eit reint tenestekjøp. Ho viser til at Juklafjord, der turistinformasjonen held til, har fått offentleg stønad og er innreia som innfallsport til Folgefonna nasjonalpark. Selskapet eig huset og leverer informasjonstenester.

– Avtalen om tilskot til turistinformasjon vert vurdert til å vera i tråd med gjeldande regelverk, skriv rådmannen, som hevdar andre aktørar rundt Folgefonna nasjonalpark har liknande modellar.

Fleire alternativ

Rådmannen har lagt fram fleire alternativ i saka. Den dyraste er å starta sesongen 1. mai. Det aukar kostnaden med 118.000 kroner. Den billegaste er å opna 1. juni, med ein kostnadsauke på 45.000 kroner. Rådmannen tilrår altså ein middelveg.

Ho vil innføra den nye opningstida som ei prøveordning i år. Før neste sesong vil ho leggja fram ei ny sak om avtalen med FE. Utvida samarbeid om reiselivsutvikling kan verta aktuelt, varslar rådmannen.