Politiet åtvarar foreldre om elsparkesykkel-trimming

I sosiale medium får ein kjøpt kodar for å trimme elsparkesyklar til å gå raskare enn fartsgrensa på 20 kilometer i timen, skriv VG.

– I mange år har barn (og vaksne) sett på dette som eit leiketøy – noko ein berre kan bruke fritt, utan noko særleg ansvar, seier trafikkoordinator Robert Bjørklund i Innlandet politidistrikt til avisa.

Aust politidistrikt har nyleg åtvara foreldre ved nesten 60 skular om at «svært mange» barn og unge bryt reglane. Dei ser at mange køyrer i 30–40 kilometer i timen.

Det er ulovleg å bruke ein trimma elsparkesykkel, åtvarar politiet. Den obligatoriske ansvarsforsikringa gjeld heller ikkje dersom det skulle skje noko.

– Foreldre må på banen: Sjekk at sykkelen er lovleg, test den sjølv, også i «sports mode» – og sjå at han ikkje overstig fartsgrensa, oppfordrar førebyggande fagansvarleg Kristoffer Haakonsen i Aust politidistrikt.

12 personar mista livet på elsparkesyklar mellom 2020 og 2024, viser tal frå Statens vegvesen som VG har henta inn. I 4 av ulykkene kunne sparkesyklane gå ulovleg fort.

– Foreldre er det viktigaste hjelpemiddelet vi har, og dei må ta større ansvar for barna sine, spesielt dei som ikkje er myndige. Dei må følge med, sette grenser og seie frå, seier Bjørklund.

I sosiale medium reklamerer anonyme kontoar for kodar som låser opp moglegheita til å køyre raskare enn sperra. Koden får ein ved å betale nokre kroner på Vipps, og så legg ein den inn sjølv for å trimme elsparkesykkelen.

(©NPK)