Tyskarar køyrde i fjellveggen
Noregsferien enda med kollisjon, men duoen i bilen kom nær uskadde frå det.
Ein bil køyrde i fjellveggen langs fylkesveg 49 i ein slakk sving på strekninga mellom Teigabergtunnelen og Jonshøgdi. Kollisjonsputene vart utløyste. Dei involverte personane var ved medvit etter ulukka, melde Vest politidistrikt i Politiloggen klokka 16.51. Politiet fekk melding om hendinga klokka 16.44.
Politiet var då på veg til staden. Trafikken vart dirigert forbi i eitt felt, etter kvart av tilsette i Kvam brann og redning, etter hendinga.
Det var to personar i bilen. Dei fekk tilsyn av ein lækjar og sende til sjekk på legevakta, og den eine hadde smerter etter hendinga, ifylgje politiet.
Dei to var tyske turistar. Føraren var ein mann i 60-åra, opplyser politiet. Politioverbetjent Anne-Siri Tysseland i Kvam, Samnanger og Tysnes politistasjonsdistrikt seier til HF at det er ukjent kva som var årsaka til kollisjonen.
Klokka 18.32 melde politiet at bilbergaren hadde fjerna bilen og at vegen var open for fri ferdsle.
