Bjørnar Sangolt (t.v.) og Vegard Markhus frå Norheimsund er nominerte til Spellemannsprisen i klassen for barnemusikk.

Tre kvemmingar kan vinna Spellemannsprisen

Nemleg Sigmund Vestrheim, Bjørnar Sangolt og Vegard Markhus. – Stas, seier dei.

Nominasjonane vart kjende i dag.

Vestrheim spelar trommer i bandet Boy Pablo, som har kome som eit stjerneskot og gjort kometkarriere i 2018. Bandet er nominert for plata Soy Pablo i klassen indie/alternativ.

Dei andre nominerte er Okay Kaya med Both, The Hjelmeland med Kulla og Fay Wildhagen med Borders.

I tillegg er bandet nominert i klassen for årets gjennombrot, der det er mogeleg å vinna Gramostipendet på 250.000 kroner. Dei andre nominerte er Lise Davidsen, Kamelen, Rotlaus og Ruben.

– Det er kjempestas! Veldig spesielt å vera med på! Me er veldig heldige som har fått mogelegheita til dette, fortel Vestrheim til HF.

Sangolt og Markhus kallar seg Naboen min. Dei har samarbeidd om prosjektet dei er nominerte for i klassen for barnemusikk: Rockesock. Med på plata er ei rekkje barnerøyster på Norheimsund skule, så tel ein dei med, er ein liten armada frå Kvam nominert.

Kvemmingane får konkurranse frå Karoline Krüger og Fru Nitters rytmeorkester med Labyrinter!, Tore Unstad med Musling med melk, og Mandarinsaft med På vei te en venn.

– Det er heilt enormt stas. Me har visst om det i eit par veker, og har hatt den tida til å summa oss. Me vart sjokkerte då me fekk beskjeden, rett og slett. Det har vore utfordrande å gå rundt og vita det utan å kunna seia det til nokon, seier Vegard Markhus til HF.