Køyrde i 137 km/t på Kvamskogen

Utrykkingspolitiet (UP) kverrsette onsdag førarkortet til ein sjåfør som køyrde i 137 kilometer i timen i 70-sona ved Eikedalen. Også ein sjåfør som køyrde i 106 kilometer i timen, mista lappen, fortel politioverbetjent Andor Helgheim i Kvam, Samnanger og Tysnes lensmannsdistrikt.

I Vikøyvegen delte UP ut fire forenkla førelegg for høg fart i 50-sona mellom klokka 10.20 og 11.20. Den høgaste farten var 70 kilometer i timen. Dessutan fekk éin sjåfør forenkla førelegg for mobilbruk.

I Hardangerfjordvegen, ved Norheimsund Servicesenter, fekk fem sjåførar forenkla førelegg for brot på fartsgrensa i 50-sona. Høgaste fart var 70 kilometer i timen. Også der vart ein sjåfør teken for mobilbruk. UP stod der mellom klokka 12 og 13.

Frå 13.30 til vel klokka 14 stod UP ved Steinsdalsfossen. Alle var lovlydige der.