Publisert 10. august 2019 kl. 17.00. Oppdatert 10. august 2019 kl. 17.43.

Tapte første kamp: - Skuffande


- men det kunne ha gått verre mot Sandviken, seier trenar Øyvind Neset Olsen.


A-laget til Øystese spelte sin første kamp etter sommarferien laurdag. Serieleiar Sandviken gav kvemmingane ein tøff kamp, som enda med 2-0 til bortelaget.

Båe måla kom i første omgang. Øystese pressa Sandviken hardare etter pause, men skapte få sjansar. Den einaste ballen Øystese fekk i nettet, vart sparka av Preben Skorpen i offsideposisjon.

Kampen mot Sandviken var den første for den «heimvende» trenaren Øyvind Neset Olsen sidan han gav seg i 2017.

- Det er godt å komma i gang, men skuffande at me ikkje skapte særleg med målsjansar, seier han.

Likevel meiner han at Øystese var heldig. Motstandarane ligg på toppen av tabellen, medan Øystese ligg på 11.-plass av 12 lag.

- Mange lag kjem til å tapa meir enn 0-2 mot Sandviken.

Laget har berre hatt to treningar etter sommaren. Når folk ser kvarandre for første gong på banen, er ikkje relasjonane på plass enno. Men laget har lagt ned eit ærleg stykke arbeid, og spelarane er einige om å støtta kvarandre uansett, seier Olsen.

Han meiner laget har sine styrkar.


- Mange spelarar plukkar opp ting raskt og er sjølvstendige. Ein treng ikkje detaljstyra dei.

Men laurdag møtte Øystese eit lag som er betre og meir samspelt, seier han.

Olsen såg det på førehand ikkje som utenkeleg å ta tre poeng, trass i plasseringane på tabellen.

- Me skulle bita frå oss. Eg såg det som ein 70/30-kamp der alt var mogleg.

- Er det bittert å ikkje ta poeng i dag?

- Nei. Me hadde alt å vinna og hadde låge skuldrer. Me grev oss ikkje ned.

Olsen ser lyst på resten av sesongen. Øystese har ti kampar att å spela, og må vinna seks av dei for å halda seg i 4. divisjon.

- For å klara det, må me skåra mål. Øystese har skåra få i år. Me skåra ingen i dag, og me hadde ingen utprega målsjansar. Me hadde nokre innlegg, men var ikkje først på dei, seier han.

Elles synest den gamle og nye trenaren at det er kjekt å vera tilbake på laget. Han hadde sjølv nokre minutt på banen og fekk heiarop frå tilskodarar.

- Det er kjekt å treffa kjentfolk og utruleg hyggeleg å sjå folk på tribunen, seier han.