Sollesnes takla presset
– Det var spanande, konstaterte Liv Sollesnes til arrangørane onsdag ettermiddag.
Publisert
Sist oppdatert
Då hadde skyttaren i Jondal Skyttarlag nettopp prestert 99 poeng i finalen i det såkalla veteranlaget på Landsskyttarstemnet på Kongsberg.
Tre av dei fire siste skota i serien på ti skot var så vidt inne i tiaren, men det heldt til å slå Mette E. Finnestad med eitt poeng.
Annonse
Dimed vann Sollesnes Norma-pokalen, som går til den beste skyttaren over 55 år i klasse 3–5, for andre gong på fire år.
Jondølingen sa til arrangørane at ho etter kvart skrudde eitt knepp til venstre, og at det truleg berga henne denne gongen. Ho var nemleg sterkt høgrevridd på blinken.
Før dei 15 skyttarane i kongelaget skulle i elden i kveld, leia Sollesnes i kampen om å verta skyttarprinsesse og nummer 2 totalt. Med fleire både mannlege og kvinnelege skyttarar med anten 247 eller 248 poeng skulle det mykje til for at ho skulle verta kongeleg i år.
Det vart ho heller ikkje, men ho klatra på listene og vart nummer 10 etter at fleire i kongelaget mista poeng då det galdt som mest. Årets skyttarkonge vart Rasmus Løberg. Helene Reigstad vart prinsesse.
