Ingen golf i Øystese

Hardanger golfklubb held golfbanen på Børve stengd inntil vidare.

Klubbstyret har vedteke å følgja golfforbundet sine råd og reglar i samband med koronapandemien.

1. april kom det nye retningsliner frå forbundet, og det lokale klubbstyret arbeider for å setja i verk reglane når banen opnar att.

Retningslinene seier mellom anna at ein ikkje skal vitja golfanlegget dersom ein har symptom på smitte. Ein må halda ein avstand til kvarandre på minst to meter. Ein skal ikkje handhelsa for å takka for spelet.

Det er sendt ut krav om innbetaling av medlemsavgift og årsavgift. Styret i Hardanger golfklubb har vedteke at medlemene berre skal betala medlemsavgifta no, og så årsavgift når banen opnar. Det kan verta aktuelt å kutta ned på årsavgifta. Dette vert vurdert når ein ser kor lenge banen må vera stengd.

– Grunnen til at me ynskjer medlemsavgifta innbetalt no, er at banen treng vedlikehald for å vera speleklar når me får signal om at me kan opna, skriv klubben.