Garen fekk A-lagskontrakt med Brann
Leah S. Garen (19) frå Kvam har skrive under på sin fyrste A-lagskontrakt med Brann. Avtalen gjeld ut 2028.
Publisert
Sist oppdatert
– Det kjennest veldig bra. Eg er veldig takksam for mogelegheita, og eg har vorte veldig glad i gjengen, Bergen og Brann, seier Garen til Brann.no.
19-åringen spela sine fyrste fotballår i Norheimsund. Vinteren 2024 gjekk ho til Brann 2, før ho skreiv proffkontrakt med Brann-Akademiet i 2025.
Annonse
Til no har Garen spela ti obligatoriske kampar og skåra to mål for Brann. Det fyrste målet kom berre nokre minutt etter at ho vart bytt inn i toppseriedebuten mot Arna-Bjørnar.
– Det var veldig uventa at eg skulle spela, og då eg kom inn, skåra eg. Eg vart litt sjokkert og visste ikkje heilt kvar eg skulle gjera av meg, seier ho til nettstaden.
Garen er den tredje spelaren som har teke steget frå Brann 2 til A-laget på kvinnesida. Maren Johnsen og Maria Flister var dei to fyrste.
– Akademiet her er veldig bra, med gode trenarar. Det kjennest godt å vera ein del av den fyrste generasjonen som tek det steget, seier Garen.
Annonse
Sportsleg leiar Lars Johan Myklebust meiner 19-åringen har gjort seg fortent til kontrakten.
– Leah har trena jamleg med A-laget og fått nokre innhopp i kamp. Ho har arbeidd hardt og målretta over tid. No gler me oss til å fylgja utviklinga hennar, seier han til brann.no.
