Publisert 04. juli 2019 kl. 09.00.

Byrkjenes trenar unge

Jonathan Varela Byrkjenes frå Strandebarm har takka ja til å vera hovudleiar for friidrett og trenar i European Youth Olympic Festival i Aserbajdsjan 21.-27. juli. Førespurnaden kom frå friidrettsforbundet, opplyser Byrkjenes. Han vert ein av seks trenarar som følgjer opp utøvarane.

Olympiatoppen har teke ut 18 utøvarar til tevlinga i Baku. Troppen reiser 19.-28. juli, og byrjar med «pre-camp» på Olympiatoppen i Oslo 18. juli. Olympiatoppen har ansvaret for å førebu og gjennomføra dei såkalla ungdomsleikane.

Byrkjenes arbeider til dagleg som dagleg leiar i Rosendal turnlag i Kvinnherad. Hans eigen spesialitet på friidrettsbanen er tresteg.