– Absurd å sitja på grasmatta og ro

For seks veker sidan reiste steinsdalingen til Amerika med fotballandslaget. 26 spelarar og om lag 30 personar i støtteapparatet er på tur. Sjølv om laget er i sentrum av alt som hender, er gjengen skjerma frå kaoset.

– Me er isolerte i vår eiga boble. Me klarer ikkje heilt å ta inn over oss kor stort det er når me ser bilete heime frå Noreg. Det er heilt uverkeleg, seier Skeie.

Mange tusen nordmenn set farge på byane og lagar god stemning der det norske laget spelar, men det er fyrst på kampdagane laget ser kor mykje liv det faktisk er, seier Skeie.

Stor interesse

For innhaldsprodusenten byrjar dagen i 09–10-tida. Skeie er med på alt landslaget gjer for å dokumentera og dela i sosiale medium. Før laget reiste, fylgde om lag 600 000 profilen på Instagram og om lag 1 million på TikTok. No er tala 1,3 millionar på Instagram og 2 millionar på TikTok.

– Det har vore ein enorm auke i interessa. Det er eit umetteleg behov. Folk får aldri nok, seier Skeie.

Les også:

Terje Skeie skal fanga VM-eventyret frå innsida

Som fylgje av tidsskilnaden hender det at Skeie sit oppe til langt på natt for å treffa betre med publiseringstidspunkta i Noreg. Helst vil han leggja flest innlegg ut på kveldstid i Noreg, men under VM har han publisert mykje på morgonkvisten. Det òg fungerer, seier han.

Mesteparten av arbeidsdagen går med til å filma, redigera og publisera innhald. Dagane er hektiske og det går i eitt. Det er mykje jobb, men kjekt, seier han. Ofte er han ikkje ferdig før han legg hovudet på puta rundt midnatt.

Skeie fortel at laget ikkje plar vera samla så lenge om gongen. Mange spelarar har familie med på tur, men dei bur på andre hotell enn landslaget gjer. Difor får spelarane treffa familiane berre etter kampane i det Skeie kallar «family and friends zone» og på dei få fridagane spelarane har. Sjølv har han hatt éin dag der han fekk gå rundt i New York.

Å vera så lenge vekke frå andre er spesielt, seier han. Ifylgje Skeie hadde laget på førehand diskutert korleis det kunne verta.

– Det kan fort bli slitasje jo lenger me er vekke, men gode resultat hjelper veldig på stemninga. Då vert alt enklare. Men ein byrjar å verta sliten etter seks veker. Det kjenner eg på. At me skal spela kvartfinale mot England laurdag, er ein god motivasjon. Det får ein energi av, seier Skeie.

– Kanskje det største

Han skildrar stemninga i USA som fantastisk. Etter kampane er alle utruleg glade. Spesielt etter kampen mot Brasil var folk stolte, seier Skeie.

– Anledninga vert så stor at ein slit med å forstå det. Me er med på det som kanskje er den største norske idrettsprestasjonen nokon gong. Det klarer eg ikkje ta inn over meg. Me har berre hatt fokus på å vinna, seier han.

Kvemmingen ser fram til å koma heim og ta alt inn over seg. Han gler seg likevel over at folk set pris på innhaldet han produserer.

I samband med VM har han laga eit YouTube-studio. I konseptet kalla «Spillerhotellet» får folk verta kjende med spelarane på eit meir personleg nivå.

– Dei fekk snakka om alt mogleg og fekk visa seg frå ei anna side, seier Skeie.

Han fortel at innhald frå episodane vart delte opp i små klipp som vart nytta i alle kanalar. Det gjer at alt innhald vert meir populært, seier dalingen. Skeie seier at han elles har prøvd å laga innhald på same måte som til vanleg. 

– Eit fenomen

Kvemmingen seier at det er liten tvil om at nokre enkeltspelarar appellerer meir til folk enn andre. Utan tvil er Erling Braut Haaland han som genererer mest publisitet, seier Skeie.

– Erling har blitt eit fenomen i USA. Marknaden her var ikkje så stor før han reiste, men no har han slått gjennom her òg. Det merkar me i våre kanalar. Dessutan bidreg roinga til mykje merksemd. Alle blir nysgjerrige på det norske laget, seier han.

Også andre enkeltspelarar, som til dømes Martin Ødegaard, trekkjer opp. Målet til Skeie er å visa fram dei andre spelarane òg. Han vonar å skapa fleire store profilar.

Før VM var Skeie veldig spent på kva som venta. Han visste at det kom til å verta stort, men visste ikkje heilt kva han gjekk til. 

– Det har eksplodert på ein endå større måte enn kva eg hadde forventa med tanke på interessa og oppstyret rundt. Eg var veldig spent på eigne arbeidsoppgåver, men det har gått veldig fint. No gjeld det å stå løpet ut til me må reisa heim. Totalopplevinga er større enn eg såg føre meg. Det er enormt! seier Skeie.

– Alt er mogleg

Størst av alt var feiringa etter sigeren over Senegal i gruppespelet, meiner han.

– Det var fyrste gongen me møttest på banen og byrja å ro. Eg såg opp på tribunen og såg kor mange tusen som var der. Der sat eg på grasmatta. Det var ei absurd oppleving. Eg er heldig som har fått oppleva det to gonger til etterpå.

Etter å ha tenkt seg om ei stund, legg han til at augneblinken då dommaren blas av kampen mot Brasil og det vart klart at Noreg skal spela kvartfinale, truleg er den største opplevinga.

Som innhaldsprodusent får ikkje Skeie filma det som skjer på banen under kamp. Difor får han vera med på roinga. 

Skeie seier at det er veldig spesielt å stå på banen og syngja framføre fansen. Men han kjenner seg ikkje som ei stjerne.

– Eg er veldig heldig som får vera med. Det er veldig få forunnt å få den opplevinga. Det er nok av andre stjerner på laget, så eg hamnar i skuggen, seier han og ler.

Han plar alltid venta på spelarane i garderoben etter kampen. Der får han filma feiring og reaksjonar.

Etter sigeren mot Brasil trur Skeie at laget kan nå heilt til topps.

– Det høyrest heilt sjukt ut å seia det, men når me har slått Brasil slik me gjorde … Me er i kvartfinale og er blant dei åtte siste. Då er alt mogleg, sjølv om det kjem til å bli veldig tøft, seier han.

Også spelarane er innstilte på at alt er mogleg, meiner han. Dei har fått sjølvtillit og meiner dei kan få til alt, ifylgje kvemmingen.

– Eg trur det tek litt tid før eg klarer å reflektera over alt som har skjedd, seier han.