Tradisjonsrik ro på Bjørketeigen

Røtene til røykstova på Bjørketeigen går langt tilbake. For tre hundre år sidan vart bygget brukt som bustadhus med ei stor, open gruve i midten. No skal lukka lag, turistar, bygdefolk og forbireisande få ta del i den tradisjonelle atmosfæren.

Tek opp gamle tradisjonar

– Eg ynskjer å ta den gamle røykstova med inn i ein ny tidsalder, fortel Boye. Saman med mannen og borna har ho budd på garden i 14 år. Då dei kjøpte garden, var alt det gamle intakt og mykje måtte gjerast. Heile tida låg draumen om å restaurera røykstova til noko ho kunne dela med andre på vent. Då ho i 2014 fekk støtte frå Innovasjon Noreg og SMIL-midlar (spesielle miljøtiltak i jordbruket), kunne draumen endeleg verta verkeleg. Materialet vart henta frå eigen skog og Viking-tre AS frå Øystese stod for bygginga. Mykje arbeid vart også gjort av familien sjølv. Eit nytt hus vart bygd utanpå den gamle røykstova, saman med ei forlenging med kjøkken. – Hadde eg visst på førehand kor mykje arbeid det skulle verta, hadde eg nok ikkje starta, fortel Boye. Ho er likevel glad for avgjerda i ettertid. Den nye delen er bygd i gammal stil, likast mogleg det originale. Å ta vare på det tradisjonelle er viktig for Boye. Bjørketeigen gav henne mykje å jobba med. Då dei tok over, var lite endra dei siste tiåra. Gamle reiskapar, brev og utstyr låg urørt. Dette har Boye teke vare på og stilt ut i røykstova. Garden hadde også ei viktig rolle under andre verdskrig. Sjur Hallgeir Mo var eitt av offera på Fossen Bratte og kom frå Bjørketeigen. Boye ynskjer å finna historia bak kva som hende her under krigen og bringa denne vidare.