Vil leggja om anleggsveg for å få ut meir stein

Hardangerskifer AS tok i juni kontakt med Ullensvang kommune for å drøfta ei omlegging av anleggsvegen i steinbrotet i Jondal.

Bakgrunnen er at vegen som vert nytta i dag, kryssar ei sone der selskapet ynskjer å ta ut naturstein og andre salsvarer. Den nye vegen er planlagd gjennom eit mindre område som er regulert til landbruks-, natur- og friluftsføremål (LNF).

Selskapet opplyser at vegen skal byggjast som ei fylling for å avgrensa inngrepet. Planen var opphavleg å søkja seinare , men endringar i fjellformasjonen i driftsområdet har gjort omlegginga aktuell.

– Tiltaket er mellombels og viktig for å sikra vidare drift i eit lengre perspektiv, skriv Hallvard Hoås Samland i førespurnaden til kommunen.

På ein førehandskonferanse 8. juli stipulerte Hardangerskifer at den omlagde vegen vil vera i bruk i fire til seks år. Kommunen peikar på at tiltaket dimed ikkje kan reknast som mellombels etter plan- og bygningslova. Grensa for slike tiltak er nemleg to år.

Kommunen kan likevel gje dispensasjon for ein bestemt periode. Tiltaket må då søkjast om som eit ordinært søknadspliktig tiltak, med ansvarlege føretak.

Selskapet vurderer også å leggja starten på den omlagde vegen over naboeigedomen 315/2. Det krev i så fall skriftleg samtykke frå grunneigaren. Hardangerskifer opplyste i møtet at den eksisterande anleggsvegen inn i brotet skal fyllast.

Sidan delar av vegen ligg i LNF-område, treng Hardangerskifer dispensasjon frå detaljreguleringsplanen for Kvernuri.

Kommunen peikar på skredfaren i området. Slik vegen er teikna inn, går han gjennom område der sannsynet for skred er vurdert til éin prosent eller meir per år. Ei tidlegare skredfarekartlegging konkluderte med at området ikkje er utsett for snø- eller lausmasseskred, men for steinsprang.

Det kan ikkje gjennomførast tiltak i desse sonene utan skredsikring. Sikringstiltak vil vera søknadspliktige og krev ha ansvarlege føretak.