Vil korkje stadfesta eller avvisa at sal er aktuelt

Ifylgje nettstaden har det gått rykte i finans- og laksemiljø den siste veka om at selskapet med base i Norheimsund i Kvam vurderer mogelegheiter for å «rigga» seg best mogeleg for framtida. Sal skal vera eit alternativ.

– Me ser på mange alternativ, men ingenting er avgjort enno, seier styreleiar, dagleg leiar og eigar Erlend Haugarvoll til IntraFish.

Han påpeikar at strengare miljøkrav og ny teknologi kan koma til å krevja store investeringar.

Haugarvoll omtalar skriveria som spekulasjonar når HF spør han om det er tilfellet at sal er aktuelt. Han stadfestar at Lingalaks arbeider med strategiar for å møta utfordringane framtida bringar, ikkje minst med tanke på miljøkrav og produksjon.

– Næringa må utvikla seg. For å få produsera meir må me ha mindre fotavtrykk. Skal me koma vidare, må me finna løysingar for framtida og rigga selskapet for å driva på ein annan måte, seier han.

Haugarvoll er spent på kva næringspolitikk som er i vente etter valet. Hans von er ein meir utviklande politikk som gjev rom også for mindre aktørar i bransjen. 

Ifylgje Intrafish kan prisen på selskapet verta over to milliardar kroner. Kjelder i finans- og oppdrettsmiljøet seier til nettstaden at fleire store aktørar kan vera interesserte, og at det mest trulege er at eit selskap i nærleiken eventuelt vert kjøparen. Til dømes Mowi, Bremnes Seashore, Firda Seafood, Alsaker Fjordbruk eller Lerøy Seafood Group.

Verksemda omsette i fjor for 954 millionar kroner. Driftsresultatet var 110 millionar kroner. Eigenkapitalen er på 410 millionar kroner.

Erlend Haugarvoll eig selskapet, gjennom andre selskap, i lag med brørne Kristoffer og Anders.