Vestlandsbedrift først i verda med karbonnøytral laks
Laks frå Eide Fjordbruk i Eikelandsosen i Bjørnafjorden kommune blir karbonnøytral, etter store investeringar i elektrifisering og direkte støtte av klimaprosjekt, fortel E24.
– Vi skal setje standarden for havbruk i framtida, seier Sondre Eide, sjef i for den vesle vestlandsverksemda Eide Fjordbruk, til nettavisa E24.
Verksemda produserer rundt 13.000 tonn laks i året og er no først i verda med å tilby kundane ein heilt karbonnøytral laks.
Artikkelen held fram under annonsen.
Oppdrettsbedrifta har elektrifisert alle anlegg og arbeidsbåtar, kjøper lokal, rein vasskraft og har fjerna brasiliansk soya i laksefôret, sistnemnde grunna både lang og forureinande frakt i tillegg til problema med ulovleg avskoging i landet.
Eide anslår sjølv at alt har kosta bedrifta nærmare ti millionar kroner.
Men trass i dei ulike miljøgrepa i Eide Fjordbruk, klarer ikkje bedrifta å kutte eigne utslepp heilt til null. Derfor har Eide starta eit samarbeid med uavhengige ekspertar på såkalla karbonnøytralisering. Dette inneber å kompensere for eigne utslepp ved å støtte karbonreduserande prosjekt som på ein positiv måte bidrar til å styrkje lokalsamfunn og bevare naturen.
Så langt går Eides bidrag til to prosjekt for høvesvis bevaring av skog og reine kokemoglegheiter i Malawi, i tillegg til forbetring og utviding av våtmarksområde og tilførsel av rein energi.
