Vestlandet manglar straumnett til grønt skifte i sjømatnæringa

Mangel på kapasitet i straumnettet kan hindre både elektrifisering og teknologisk utvikling i sjømatnæringa på Vestlandet, viser ein ny rapport frå Menon Economics.

– Sjømatnæringa er stadbunden. Ho kan ikkje flytte etter kapasitet – ho må liggje langs kysten, sa senior manager i Menon Economics, Oddbjørn Grønvik, då rapporten nyleg vart presentert.

Rapporten viser at behovet for straum i sjømatnæringa nasjonalt kan auke med opptil 140 prosent fram mot 2040. Vestlandet står for ein stor del av denne veksten, og er samtidig ein av regionane med mest press mot straumnettet.

– Dette er eit nett som ikkje er rigga for den veksten som er venta i sjømatnæringa, seier Grønvik i ei pressemelding.

Rapporten peikar på fleire område der tilgangen allereie er kritisk. Dei mest krevjande regionane er Nord-Noreg, Sunnmøre og Bergensområdet/Haugalandet.

Det er FHF – Forskingsfinansieringa til fiskeri- og havbruksnæringa – som har finansiert rapporten av Menon Economics.

(©NPK)