Vestland vil ha innspel til klimaplan
Vestland fylkeskommune er i gang med å lage regional klimaplan. No vil ein ha innspel til klimaarbeidet gjennom ei høyring.
– Slik kan vi få ein god klimaplan, som hjelper oss å dra heile Vestland i same retning, nemleg mot målet om at vi skal vere ein pådrivar for klimaomstilling og nullutslepp innan 2030, seier fylkesordførar Jon Askeland i ei pressemelding.
I utkastet til planprogram som no er ute på høyring, føreslår fylkeskommunen desse tre hovudområda i planen: utsleppsreduksjon, klimatilpassing og å sikre naturmangfald.
Artikkelen held fram under annonsen.
Fylkesordføraren oppmodar alle delar av vestlandssamfunnet til å engasjere seg i dette viktige arbeidet: bedrifter, kommunar, lag og organisasjonar, ungdomsråd, privatpersonar, alle som vil.
– Dess fleire som engasjerer seg, dess betre grunnlag har vi for å lage ein grundig, relevant og godt forankra plan, seier Askeland.
Sjølve klimaplanen skal vere ferdig hausten 2022.
Fristen for å kome med innspel er 18. juni i år.
