Ventar laber påskehandel

Påskeveka er vanlegvis den travlaste veka hos Mo Sport AS. Slik vert det neppe i år.

Hytterestriksjonane gjer at kundane frå Kvamskogen har forsvunne heilt, fortel dagleg leiar Arve Øyri.

– Det vil nok gjera at ein stor del av påskehandelen forsvinn. Likevel har me framleis ein del kundar i butikken. Kanskje kan det at fleire kvemmingar handlar lokalt, kompensera litt for at hyttefolk ikkje kjem, seier han.

Mo Sport permitterte 2,6 av om lag ni årsverka i butikken kort tid etter at pandemien kom til landet. Øyri trur ikkje fleire vert permitterte med det første.

– Snarare tvert imot. Etter påske skal me ha eit sesongskifte i butikken. Me flyttar vekk vintervarene og flyttar fram vår- og sommarvarene. Då treng me fleire hender og kjem til å henta inn nokre av dei permitterte, seier han.

Kjøper andre ting

Øyri fortel at viruset har ført til endringar i kva folk kjøper.

– Det er fleire som kjøper treningsutstyr, sidan treningssentera er stengde. Dessutan sel me fleire syklar enn me plar gjera på denne tida av året Årsaka er truleg at alpinsentera er stengde, slik at folk leitar etter andre måtar å vera aktive på, seier han.

Som så mange andre butikkar har Mo Sport innført tiltak for å hindra smittespreiing. Mellom anna er det plassert ut stasjonar med desinfeksjonsmiddel i butikklokala. Dei tilsette freistar halda avstand til kvarandre og til kundane. Døra mot fylkesvegen stengd for å hindra at dørhandtaket skal fungera som smittespreiar. Kundane må koma og gå gjennom den automatiske døra mot Grovagjelet.

Viruset gjer at folk oppfører seg annleis i butikken.

– Mange brukar mindre tid på å sjå seg omkring. Dei er målretta, finn det dei skal ha og går, fortel Øyri.

Spanande sommar

Den daglege leiaren er usikker på kva langsiktige konsekvensar pandemien får. Sjølv om talet på turistar frå utlandet vert lågare, kan talet på norske tilreisande auka.

– Nordmenn har ofte god kjøpekraft, og i normale somrar legg dei att mykje pengar i utlandet. I år må truleg mange feriera i heimlandet. Det vert spanande å sjå korleis sommaren vert. Ei utfordring med koronaviruset er at ingen veit kor langvarige restriksjonane vert. Så lenge det ikkje vert altfor lenge, trur eg Mo Sport skal koma seg greitt gjennom det. Me er optimistar, seier han.