Slik såg det ut då vatnet fossa over muren langs fykesvegen i natt. Foto: Vidar Dahle

Vegen stengd mellom Norheimsund og Vikøy

Eitt hus vart evakuert då vatnet fossa ned frå hovudvegen i natt. Vegvesenet ventar å kunna opna eitt felt klokka 16.

Trafikkoperatør Eirik Rystad Skånøy i Vegtrafikksentralen vest fortel at Vegvesenet ventar å kunna opna eitt felt klokka 16. Ein vil prøva å sleppa bussar gjennom etter skulen.

Vikøyvegen vart stengd torsdag natt etter at ei elv fløymde over. Elveløpet vart tetta, og vatnet rann ut i fylkesvegen og fossa etter kvart over muren langs nordaustsida av vegen. Vatnet har ført med seg mengder med gjørme, trevyrke og stein som ligg att i vegen.

Eitt hus vart evakuert. Det er ikkje meldt om personskade, men ein del skade på veg og omgjevnader, opplyser Vest politidistrikt på Twitter.

Vegen skadd

Dei to bebuarane, Marta Apelthun Hamre og Inge Hamre, er attende i huset no. Dei varsla om situasjonen etter at vatnet rann inn i huset deira i 2.30-tida i natt.

Politiet, brannvesenet og representantar frå Kvam herad rykte ut til staden. Politiet er ferdig med undersøkingane, og Vegtrafikksentralen har teke over trafikkdirigeringa.

Vegvesenet tilrår omkøyring via Eikelandsosen. På minst ein stad er fylkesvegen skadd av massane.

Artikkelen held fram under annonsen.

Sette inn båtskyss

Kvam herad melder på heimesida si at det er sett inn båtskyss for skuleelevar, helsepersonell og tilsette ved skulane. Båten går mellom Framnes kai og Norheimsund mellom 7.30 og 9. Det er ikkje sett opp transport for born i barnehagane.

Bussane som skal til Strandebarm, er hindra. Det vert sett inn minibussar på sørsida, men med nokre forseinkingar.

Heradet sette krisestab i 04-tida i natt. Leiar for barnehage og skule, Beate Gauden, fortel at det vart drøfta å avlysa skuledagen, men at dette vart droppa sidan ein fekk ordna båtskyss.

Provet låg att

Det vart i dag tidleg pumpa vekk vatn, og massar vart gravne ut frå elveløpet med gravemaskin. Framleis låg det mykje gjørme i vegen ovanfor dei mest utsette husa, og nærare Vikøy var det enno mogeleg å ta seg ein symjetur i vegen. Vatnet stod minst ein halvmeter opp på muren langs gang- og sykkelvegen.

Også grusvegen mellom Vikøy og Tveit er øydelagd og stengd for all trafikk.

Flaum på Kaldestad i Norheimsund. Foto: Sigbjørn Linga
Flaum på Kaldestad i Norheimsund. Foto: Sigbjørn Linga
Flaum på Kaldestad i Norheimsund. Her var årsaka til flaumen. Det gjekk tett der vatnet skal renna under fylkesvegen. Foto: Sigbjørn Linga
Flaum på Kaldestad i Norheimsund. Fylkesvegen var skadd av vatnet. Foto: Sigbjørn Linga
Flaum på Kaldestad i Norheimsund. Då HF var på staden, stod det framleis vel ein halvmeter med vatn i vegen sør for staden der bekken fløymde over. Tidlegare på natta rann det over muren langs vegen. Foto: Sigbjørn Linga
Flaum på Kaldestad i Norheimsund. Mykje gjørme ligg att på vegen. Foto: Sigbjørn Linga
Flaum på Kaldestad i Norheimsund. Foto: Sigbjørn Linga
Flaum på Kaldestad i Norheimsund. Kari-Iren Kvarv på Kaldestad måtte gå til jobb i Norheimsund i dag, men slapp elles billeg unna flaumen. Foto: Sigbjørn Linga
Flaum på Kaldestad i Norheimsund. Støvlar var naudsynt fotøy for dei som skulle gå til arbeid i Norheimsund. Foto: Sigbjørn Linga
Flaum på Kaldestad i Norheimsund. Skuleborn og arbeidsfolk vart frakta med både ribb og andre båtar. Her er skuleborn på veg frå Norheimsund til Vikøy. Foto: Sigbjørn Linga
Flaum på Kaldestad i Norheimsund. Skuleborn og arbeidsfolk vart frakta med både ribb og andre båtar. Her kjem nokre av dei til Norheimsund. Foto: Sigbjørn Linga
Flaum på Kaldestad i Norheimsund. Ordførar Jostein Ljones kom til staden for å sjå på skadane. Krisestab vart sett midt på natta. Foto: Sigbjørn Linga
Flaum på Kaldestad i Norheimsund. Håkon Norheim hadde ingenting mot ein ribbtur som start på skuledagen. Litt seinka skulestart vart det på friskulen i Vikøy.
Flaum på Kaldestad i Norheimsund. Fylkesvegen slik han såg ut i dag tidleg.