– Utfordringa er å bli forstått

Det sa administrerande direktør Arthur Kordt i European Cruise Service AS på Fjordtinget i Kunsthuset Kabuso i Øystese onsdag.

Han snakka om kva ei cruisehamn kan bety i form av auka verdiskaping og nye arbeidsplassar i Kvam.

Kordt sa at det finst nesten to milliardar turistar i verda og at potensialet for cruise er stort.

Ifylgje direktøren starta turismen i Lofoten med cruise. Cruiseturismen som starta for om lag førti år sidan, var fundamentet for det som skjedde seinare, sa han. Då stod cruiseturismen for om lag åtti prosent av turismen. No har annan turisme vakse, og cruiseturismen i området utgjer om lag tjue prosent. Ei av fylgjene er at Stamsund kan ha to «fine dining»-restaurantar opne heile året, sa Kordt.

Han meiner dessutan at utbygginga av Fløibanen i Bergen ikkje hadde skjedd utan cruiseturisme.

Vil starta i 2028

Prosessen med å regulera ei cruisehamn i Oddesvik i Øystese er i gang. Kordt har ambisjonar om å opna den nye destinasjonen våren 2028.

Tidlegare har direktøren vore med på å utvikla tre–fire cruisedestinasjonar. Det vart lettare etter at «Seawalk» – ein flytekai – vart eit alternativ til sementkai. Kostnadane er lågare og inngrepa i naturen mindre, sa han.

– Utfordringa er å bli forstått. At me kan gjera dette på ein sånn måte at det er i balanse med dei som bur her, er heilt sentralt, sa Kordt.

Han meiner at turistnæringa må vera ein fordel for fastbuande for at prosjektet skal lukkast. Kordt hevda at cruiseturisme i Kvam kan ha ein årleg verdi på 200–300 millionar kroner. 84 av desse kan ein realisera utan investeringar, meiner han.

– Eg får ofte spørsmål om det er arbeidsplassar og kapasitet til dette. Eg seier eintydig ja. Det er ikkje noko problem, sa han.

– Lyst til å bli og bu

Delar av cruiseføredraget stod Øyvind Emanuel Fryjordet Vennerød i Menon Economics for. Han sa at reiselivsnæringa kan kan gjera det betre å bu i Kvam om ein får utvikla nye attraksjonar og serveringsstader. Folk må ha lyst til å bu og bli i området gjennom eit breiare tilbod som styrkjer lokalsamfunnet, sa han.

Ein må minimera belastinga på naturen og kulturgoda, konsekvensane for andre samfunnsfunksjonar og miljø- og klimautslepp. Å få turistane inn sjøvegen er meir effektivt enn å byggja infrastruktur på land, meiner han.

Vennerød har sju kriterium eit reisemål bør vurdera før etablering av cruisehamn: natur og kulturgode, kommersiell kapasitet, barrierar, sesongvariasjon, befolkning og reiselivsintensitet og befolkningsutvikling. 

I Kvam finst mange attraksjonar og flott natur. Ein må sjå på kva reiselivstilbod som finst i regionen og kva ein kan utvikla for å maksimera verdiskapinga og utnytta potensialet, sa han.

– Treng meir næringsliv

Nyleg vitja Kordt Nordfjordeid. Kommunedirektøren der meiner at utviklinga etter etableringa av cruisehamna har vore fabelaktig, ifylgje Kordt. Det har gjeve mange nyetableringar. Det einaste ein uroar seg for, er rammevilkåra, hevda Kordt.

Han sa at det er 14 kaiar mellom Stavanger og Bergen, og at alle er smekkfulle. Ifylgje Kordt er 100 anløp i året å rekna som full. 

– Det er ei fantastisk moglegheit for Kvam, Øystese og Hardanger. Me treng ein slik kai, og Hardanger treng meir næringsliv. Eg håpar me får dette til, sa Kordt.

Jarle Bjørke var ein av deltakarane på Fjordtinget. Han seier at det var spanande å høyra på Kordt. Bjørke skildrar cruise som eit tviegga sverd.

– Når du høyrer skildringa her, får du ei anna side av saka enn den lokale vinklinga, som ofte er negativ, seier han.

Kvam er attraktiv

Ifylgje Vennerød er det moglegheiter for å utvikla tilbod i Kvam, sjølv om heradet ikkje er så stort.

– Reiselivsnæringa er næringa som har størst rom for vekst, sa han.

Ei utfordring er å få tak i nok folk. Dess lenger sesongen varar, dess lettare er det å tiltrekkja seg fleire arbeidarar, sa han. Difor må Kvam sjå på moglegheitene for å få til ein lengre sesong.

– Det vil bli ein nøkkelfaktor for å lukkast, sa Vennerød.

Han sa at Kvam har hatt vekst i folketalet, at det har stagnert og er venta å falla. Difor trengst ny aktivitet, meiner han.

– Samla er vår vurdering at Kvam er ein attraktiv destinasjon som cruisehamn, men ein må syta for lokal verdiskaping, sa Vennerød.