Trusetriks skal fortelje om jordkvalitet

Norsk landbruksrådgiving har i desse dagar eit prosjekt på gang der bønder over heile landet skal grave ned bomullstruser i jorda for finne ut kor god eller dårleg jordkvaliteten deira er.

Trusene skal liggje i om lag to månader i jorda. Dersom bomullstrusene då er brune og oppetne, er det eit teikn på god kvalitet, skriv NRK.

Ei roten truse er nemleg det beste teiknet på sunt og livleg jordliv – på gode dyrkingsforhold og føresetnader for avlingar av topp kvalitet.

Oppskrifta på trusetrikset er enkel:

Trusa skal leggjast flatt 5–10 centimeter ned i jorda. Det er ein fordel at linninga stikk opp, slik at ho er lett å finne igjen om to månader når ho har gjort jobben sin.

For å lære mest mogleg om eiga jord, anbefaler Norsk landbruksrådgiving at bøndene grev ned to truser. Éi der dei trur at det er mykje jordliv, éi der dei trur det er lite.

Målet er at bomullstrusene skal gjere bøndene ekstra merksame på god jordhelse.

Så står att det å sjå kven av bøndene som har den styggaste, brunaste og mest holete trusa til hausten.