Tre tilfelle av mutert koronavirus påvist i Vestland

Den britiske varianten av koronaviruset er påvist i Bjørnafjorden og Bergen kommune. Det muterte viruset er meir smittsamt enn det opphavlege viruset.

I Bjørnafjorden kommune vart det muterte viruset oppdaga etter at ein mann i 50-åra 2. januar fekk påvist koronasmitte, skriv Bergensavisen.

Prøva til mannen vart sendt vidare til fleire analysar etter at mannen var nærkontakt med ein person som hadde komme til Noreg frå Storbritannia. Kommunen opplyser at det med unntak av to nærkontaktar ikkje er mistanke om vidare spreiing.

– Desse to nærkontaktane har heilt sikkert hatt denne virusvarianten, dei òg, men berre prøva til mannen i 50-åra vart send til mutasjonsanalyse, seier kommuneoverlege Klaus Melf.

Ifølgje NRK kom smitten truleg med eit britisk følgje som skulle på julebesøk i kommunen.

– Mannen vart truleg smitta i bilen heim frå flyplassen, sjølv om det vart brukt munnbind, seier Melf.

I Bergen kommune er det oppdaga to tilfelle av det muterte viruset, skriv Bergens Tidende. Ifølgje avisa er det to ulike tilfelle utan kontakt med kvarandre.

– Vi har dette under kontroll, og uroar oss ikkje for vidare spreiing av dette, seier smittevernoverlege Egil Bovim.

(©NPK)