Straumbrot i Jondal

Indre Hordaland Kraftnett melde på heimesida onsdag kveld at straumbrotet råka området frå Jondal mot Utne. Årsaka var brot i hovudforsyninga frå Mauranger. 

Til saman var mellom 950 og 1000 kundar straumlause i nesten halvannan time, ifylgje Hardanger Folkeblad.

Feilen var varig, og det vart arbeidd med å gjenoppretta forsyninga via reservenettet, melde netteigaren.

HF forsøkte fånyttest å få kontakt med nettsjef Øyvind Svarteit i Indre Hordaland Kraftnett torsdag morgon. Til oddabladet seier han at han ikkje visste noko om årsaka, men at selskapet venta på ein rapport.

Straumbrotet førte til seinkingar i ferjesambandet på inntil ein halv time onsdag kveld, melde Fjord1 i ei driftsmelding på vegner av Skyss.

I alle fall i Herand kom straumen tilbake om lag klokka 22.15, opplyste ein ibuar HF var i kontakt med der.

Driftsvakta opplyste til oddabladet at det tok lang tid å få straumen attende, fordi ein måtte kalla ut ekstra mannskap som hadde eit stykke å køyra.