Stortinget vil ha lokale varer i Vinmonopol- hyllene

Stortinget vil at Vinmonopolet skal ta inn lokalproduserte drikkevarer. Helse- og omsorgskomiteen leverte innstillinga si tysdag.

Heile komiteen stiller seg bak Frps representantforslag. Frp står likevel åleine om dei fleste av dei andre forslaga frå partiet.

– Noreg har ein lang tradisjon for produksjon av eigne drikkevarer i verdsklassen. Likevel finn ein i for lita grad kortreiste, lokale eller norske produkt i hyllene på Vinmonopolet. Derfor har Framstegspartiet teke til orde for at Vinmonopolet i Noreg må forplikte seg til å ta inn lokalproduserte varer, og no får vi fleirtal for dette, skriv helsepolitisk talsperson Åshild Bruun-Gundersen til NTB.

Ho peikar mellom anna på at det er rundt 20 handverksdestilleri om lag 120 småskalabryggjeri i Noreg.

– Desse destilleria og bryggjeria sørgjer for lokale arbeidsplassar, og vi må derfor òg sikre at Vinmonopolets kundar i større grad får tilgang til lokalproduserte drikkevarer.

Det skal vere mogleg å kunne leve av å drive med småskala alkoholproduksjon i Noreg, seier generalsekretær Ingunn Jordheim i Foreininga til vin- og brennevinsleverandørane (VBF) til NTB.

– Dette skapar både arbeidsplassar, bidreg til større kvalitetsmedvit og varetaking av lokale og nasjonale tradisjonar. Frp fekk dessverre ikkje fleirtal for fleire gode forslag som hadde kunna bidra til å vidareutvikle ei næring som har sterk internasjonal konkurranse, seier ho.

Jordheim peikar på at av dei meir enn 28.000 produkta som blir selde gjennom Vinmonopolet, er berre rundt 1.650 norske produkt.

– Målsetjinga må vere at norske produsentar får rammevilkår for produksjon og sal som gjer det er mogleg å konkurrere både heime og ute, seier Jordheim.

(©NPK)