Kommunal- og moderniseringsminister Nikolai Astrup (H) får ikkje fullt gjennomslag i Stortinget for forslaget sitt til kriselov for kommunane. Foto: Berit Roald / NTB scanpix

Stortinget seier nei til delegering av makt i kommunane

Stortinget set foten ned for regjeringsforslaget om å la kommunestyra overføre makt til formannskapa.

Det er klart etter at kommunal- og forvaltningskomiteen på Stortinget måndag la fram innstillinga si om den nye kriselova som regjeringa har foreslått for kommunane.

I lovforslaget, som vart lagt fram fredag, foreslo regjeringa å gi kommunestyra moglegheit til å delegere myndigheit til formannskapa i saker om interkommunalt samarbeid. Det vart òg opna for tilsvarande delegering av makt frå fylkestinga.

Artikkelen held fram under annonsen.

Kommunal- og forvaltningskomiteen går no einstemmig inn for å fjerne paragrafen.

Komitéleiar Karin Andersen (SV) meiner unntaket rett og slett ikkje er nødvendig, sidan det samtidig er innført moglegheit for å halde kommunestyremøte på nett og for å gjere meir av saksbehandlinga skriftleg.

– Under behandlinga spurde vi departementet om ein kunne vise til døme at dette var ei akutt problemstilling. Det kunne ein ikkje, seier Andersen til NTB.

Resten av delane i kriselova får derimot gjennomslag. Lovforslaget kjem opp til behandling i stortingssalen tysdag.

(©NPK)

Kommunal- og moderniseringsminister Nikolai Astrup (H) får ikkje fullt gjennomslag i Stortinget for forslaget sitt til kriselov for kommunane. Arkivfoto: Håkon Mosvold Larsen / NTB scanpix / NPK