Lærdalstunnelen kan bli nattestengt, utan kolonnekøyring, i fire år. Foto: Marit Hommedal / NTB scanpix / NPK

Sterke reaksjonar mot nattestenging av Lærdalstunnelen

Statens vegvesen vil nattestenge den sterkt trafikkerte Lærdalstunnelen i fire år. Det får transportnæringa til å reagere sterkt.

– Vi køyrer jo først og fremst om natta, og nesten alle våre bilar går gjennom Lærdalstunnelen kvar natt. Så dette vil få store konsekvensar for oss som bedrift, med tap både av oppdrag og arbeidsplassar, seier Arne Slinde Ahlin, dagleg leiar i Slinde Transport, til NRK.

Saman med fjellovergangen over Filefjell er tunnelen på E16 stamveg mellom aust og vest i Sør-Noreg. Den 22 år gamle tunnelen skal no bli oppgradert for å tilfredsstille den nye sikkerheitskrava til tunnelar.

Ahlin i Slinde Transport trur hans firma må nedbemanne kraftig dersom tunnelen blir nattestengt.

Han får støtte frå regionleiar Jan-Ove Halsøy i Norsk Lastebileierforbund, som meiner Vegvesenet sin plan om stenging utan kolonnekøyring ikkje er akseptabel.

– For oss verkar dette heilt utenkjeleg. Varene blir køyrde frå Oslo til Bergen om natta. Dette vil bli ei kjempeutfordring for næringslivet og transportnæringa og få enorme konsekvensar seier Halsøy.

Forbundet møter Statens vegvesen i slutten av september for å sjå om dei kan finne ei anna løysing.

Rune Sandven, prosjektleiar i Vegvesenet, seier valet om ikkje kolonnekøyring er tatt for å få arbeidet gjort på kortast mogleg tid og ikkje gjere byggjekostnadane høge.

Han seier han likevel trur på ei løysing som alle partar kan leve med.

– Vi finn alltid ei løysing. Vi er nøydde til det. Elles blir det dårleg stemning, og det ønskjer vi ikkje. Men entreprenøren skal ha brukbare arbeidsforhold, vi skal bruke kortast mogleg tid og så må samfunnstenestene gå så godt som mogleg, seier prosjektleiaren.

(©NPK)