Statkraft: – Trygge på at vi har god kapasitet i vassmagasina gjennom vinteren
Statkraft svarer på bekymringar om låg fyllingsgrad i kraftmagasina. Kapasiteten er tilstrekkeleg gjennom vinteren, opplyser dei.
– Vi har ansvar for å sikre at vi kan levere nok kraft heile året. Vi følgjer nøye med og er medvitne situasjonen. Vi er framleis trygge på at vi har god kapasitet i magasina våre gjennom kommande vinter, seier direktør for energidisponering i Norden i Statkraft, Torbjørn Olsen, i ein e-post til NTB.
Torsdag kom statistikk frå NVE som viste at fyllingsgrada i norske vassmagasin er lågare enn normalen. Årsaka er mellom anna ein vinter med lite snø i Sør-Noreg og ein tørr sommar.
Annonse
SV: – Blir stadig verre
I tillegg har det vore mindre vindkraftproduksjon enn normalt både i Sør-Noreg, Danmark og på kontinentet, opplyser Statkraft.
– Situasjonen blir stadig verre, og det hastar med at energiministeren pålegg kraftselskapa å spare på vatnet i Sør-Noreg, sa stortingsrepresentant Lars Haltbrekken (SV) til torsdag.
Han kravde stans i straumeksporten for å fylle vassmagasina.
Annonse
No roar Statkraft.
– Vi vurderer, til liks med NVE, kapasiteten i magasina våre gjennom vinteren, som tilstrekkeleg, opplyser dei.
– Reknar med normalisering av nedbøren
Statkraft viser til at det er over 1000 vassmagasin i Noreg med ulike eigenskapar, hydrologiske forhold og geografisk plassering.
– Vi reknar med at vi er på veg inn i ein periode med normalisering av nedbøren, noko som vil betre magasinfyllinga fleire stader i landet. Men om vi skulle få ein tørr haust, så har vi fleirårsmagasin som til dømes Blåsjø, som vi kan produsere frå, seier Olsen.
Han viser også til at Sør-Noreg har godt høve til å importere kraft.
Annonse
– Sambanda til nabolanda våre, bidreg til at vi kan disponere vasskrafta betre. Ved at vi kan importere kraft frå utlandet når vinden blæs og sola skin der, kan vi spare på vatnet i periodar med lågt behov og låge prisar.
