Lavvoen med ein diameter på kring fire meter forsvann i pinsehelga. Benker og leiker låg att.

Stal lavvo i barnehage

Då born og tilsette kom til Norheimsund barnehage etter pinsen, var lavvoen deira borte vekk.

Det opplyser politioverbetjent Ann-May Garen ved Kvam, Samnanger og Tysnes lensmannskontor. Den grøne lavvoen står normalt ikkje der han vart stolen, men har i «koronatida» vore nytta som samlingsstad i det inngjerda barnehageområdet.

Lavvoen som er stolen, med ein diameter på cirka fire meter, stod nær inngangsporten nærast kyrkja. Ein annan lavvo ved barnehagen fekk stå i fred.

Artikkelen held fram under annonsen.

Ifølgje Garen må tjuveriet ha skjedd ein gong mellom fredag klokka 16 og tysdag morgon. Politiet er interessert i tips frå personar som eventuelt har sett noko uvanleg i området.

Benker og leiker som var i lavvoen, er ikkje stolne.

Garen melder elles om ei roleg pinsehelg med tanke på kriminalitet.