Lofthus får framleis tingrettskontor, men ikkje hovudsetet, om Hardangerrådet får gjennomslag for strategien. Arkivfoto. Sigbjørn Linga

Slår tingretts-tøla saman

Hardingane - i alle fall dei i Hardangerrådet - har gjeve opp kampen for eigen tingrett i Hardanger. I vinter har rådet drøfta saka med Samarbeidsrådet for Sunnhordland. Enden på visa er semje om at det er godt nok med eit lokalt tingrettskontor på Lofthus, underlagt tingretten på Stord. Det inneber samanslåing av dei to tingrettane.

12. mars sende rådsordførar Hans Petter Thorbjørnsen i Hardangerrådet og styreleiar Wenche Tislevoll i Samarbeidsrådet for Sunnhordland eit brev til Domstolkommisjonen, som arbeider med en rapport om ny tingrettsstruktur. Dei skriv at det er lite truleg med vidareføring av dagens to tingrettar i regionane, og at dei er samde om den nye distriktsmodellen.

I tillegg har dei tilsette i dei to tingrettane inngått ein intensjonsavtale om samanslåing. I hardangerrådsmøtet i Jondal torsdag drøftar medlemene eit framlegg om å gje støtte til intensjonsavtalen. Avtalen seier at dagens ordnijng med rettssalar i Odda og Norheimsund skal halda fram for å ta omsyn til dei geografiske avstandane.