Sløkte blått blåhuslys

Det brenn såleis ikkje lenger eit blått lys for sentrumshuset i Jondal som offentleg eigedom.

Ikkje uventa stadfesta kommunestyret i Ullensvang onsdag tilrådinga frå formannskapet samrøystes: Blåhuset vert ikkje selt. Bygget skal ifylgje vedtaket verta ei form for «næringslivs- og reiselivshub» med offentlege og private kontor. Huben skal veksa fram i samarbeid mellom kommunen og næringslivet, og gjerne med fylkeskommunal hjelp.

Vedtaket inneber at Olav Kant og Henning Grønhaug, som med 2,51 millionar kroner leverte det høgaste bodet, ikkje får kjøpa bygget i tråd med innstillinga frå rådmannen. Det inneber i tillegg at vel 150 000 kroner som er bruka på salsprosessen, ikkje har gjeve sluttresultat.

Avgjerda kom i stand utan mange andre sverdslag enn det som handla om kven som har vore for og mot å kvitta seg med huset. Og dei harde fakta er at berre R røysta mot då salet vart vedteke i debatten om 2025-budsjettet hausten 2024.

– Det er inga skam å snu, konstaterte Terje Kollbotn (R).

Fekk nytt tal

Eit av argumenta i vedtaket om å droppa salet er uvisse om den stipulert innsparinga på 250 000 kroner. 

Randi E. Oppedal (Sp) vart den einaste som spurde rådmannen om reknestykket som ligg til grunn for estimatet. Det gjorde ho i sjølve møtet onsdag.

Då kom det fram at rådmann Ole-Jørgen Jondahl meiner at innsparinga er høgare, nærare bestemt 284 486 kroner i året, og at talet er heilt sikkert. Vel å merka rommar reknestykket eit overslag over kor mykje kommunen brukar innan byggdrift (10 prosent av ei stilling) og reinhald (8 prosent av ei stilling) på huset i Jondal. Elles utgjer straumutgiftene 70 000 kroner av summen.

Leigeinntekter vart ikkje omtala av rådmannen, og er heller ikkje omtala i økonomiplanen frå 2024 der sal av huset var eit av punkta.

Jondahl sa onsdag at summane burde ha vore del av saksopplysingane.

– Kva vil jondølingane?

Fleire understreka at kommunen, næringslivet og ibuarane i Jondal no må samarbeida for å skapa liv i huset.

– Utvikling av Blåhuset er ikkje berre ei kommunal oppgåve. Det er litt opp til kva innbyggjarane vil, sa Jørund Kvestad (Sp), som fortalde at folkevalde har vore utsette for press frå krefter som ville droppa salet.

Eirunn Lothe Midtun (Ap) meiner at politikarane er nøydde til å planleggja for kommunale kontorplassar i Jondal. Ho meiner innsparinga er usikker og dessutan minimal. Huset kan brukast i samband med den kommunale satsinga på fonna, meiner ho.

Midtun meiner at tilsette i kommunen som bur i Jondal, bør få høve til å arbeide nokre dagar i veka i Blåhuset. Dessutan, sa ho, kan kommunen marknadsføra ledige stillingar med mogelegskap for kontorplass her, for å letta rekrutteringa til dømes i Kvam eller mot Bergen.

Elin Eide Brattabø (H) meiner at det trass alt er kommunen som sit med det største ansvaret for å fylla huset med aktivitet. Då må han leggja til rette for at fleire kan vera der, sa ho. Lukkast ein ikkje, må ein vurdera saka igjen om nokre år, sa ho.

Kollbotn tipsa om at Næringshagen i Ullensvang AS kan medverka til å gjera Blåhuset til eit robust arbeidssenter. Han sa at han ynskjer ei snarleg løypemelding om korleis rådmannen ligg an med å skapa nytt liv i huset.

Om sentralisering

Oppedal slo fast at intensjonsavtalen mellom kommunane i samband med kommunesamanslåinga er gravlagd for lengst. Avtalen seier mellom anna at kommunehusa i Kinsarvik og Jondal «skal nyttast til kommunal tenesteyting». Ho ottast at sentraliseringa vil halda fram.

Og medan ordførar Roald Aga Haug (Ap) påstod at Ullensvang, med til dømes talrike skular og barnehagar, kanskje er den minst sentraliserte kommunen i Vestland, meiner Oppedal at det finst fleire døme på sentralisering berre i Røldal. Pluss at landbrukssjefen har frammøtestad i Odda. Intensjonsavtalen seier at «administrasjon for tekniske tenester, landbruk og skogbruk skal vera lokalisert i Ullensvang» (Ullensvang herad, red. merknad).

Haug minte om at også Sp føreslo å selja Blåhuset for vel eitt år sidan, medan Oppedal har avvist at Sp har ynskt å selja huset. Ordføraren oppmoda Oppedal om å vera ærlegare.

– Då er det lettare å stola på representanten i framtida, sa han.

Oppedal vedgjekk at ho ikkje hadde heile budsjettet friskt i minnet, sidan ho ikkje driv med politikk på heiltid, men forsikra om at ho er til å lita på.

HF gjer merksam på at Eirunn Lothe Midtun er kusina til skribenten. Red.