Samde om krisepakke på 50 milliardar utan utbyteforbod

Det er brei semje på Stortinget om ei kontantstønadsordning for bedrifter. Fleirtalet vil ikkje nekte bedriftene å betale ut utbyte eller å seie opp folk.

– Det er brei semje. Det er bra, seier Senterparti-leiar Trygve Slagsvold Vedum til NTB.

– Denne kontantstønaden til bedrifter er eitt av dei største vedtaka Stortinget har gjort nokon gong. Det som ville vore utenkjeleg for tre–fire veker sidan, vart no heilt nødvendig, seier han.

Regjeringspartia Høgre, Venstre og KrF har forhandla med Arbeidarpartiet, Framstegspartiet, Senterpartiet og SV om ordninga gjennom helga og måndag.

Hovudmålet med henne er å redde bedrifter som er hardt ramma i samband med koronaepidemien, frå å gå konkurs. Titusenvis av jobbar er råka.

Finansminister Jan Tore Sanner (H) har sagt at ordninga kan koste rundt 20 milliardar kroner i månaden. Totalt blir prislappen anslått til 50 milliardar.

Ikkje utbyteforbod

I all hovudsak er dei sju partia samde om modellen som Sanner og næringsminister Iselin Nybø (V) la fram torsdag førre veke. Detaljane vil bli lagde fram på ein pressekonferanse på Stortinget tysdag klokka 10, før saka blir behandla i salen seinare same dag.

I ordninga vil mesteparten av dei uunngåelege utgiftene til bedriftene som opplever minst 30 prosent inntektsfall på grunn av koronautbrotet, bli dekte. Bedrifter som er pålagde av staten å stengje, får mest.

Delar av venstresida har teke til orde for eit forbod mot utbetaling av utbyte og å nekte bedriftene å seie opp folk, men ifølgje NRK har dei ikkje fått gjennomslag for dette i forhandlingane.

– Sp har meint heile tida at bedriftene må følgje norsk lov. Viss dei ikkje har noko anna val enn å nedbemanne, har dei ei plikt til å gjere det for å redde bedrifta si, seier Vedum.

I staden kjem Stortinget med ei oppmoding til bedrifter som får stønad, om å ikkje gi utbyte. Det kjem truleg òg ei formulering der det blir oppmoda om at bedriftene bør unngå oppseiingar i stønadsperioden.

Sesongbedrifter

Vedum trekkjer fram at ordninga har vorte forbetra når det gjeld typiske sesongbedrifter, som får ei ekstra utfordring sidan krisa råkar midt i høgsesongen deira.

Mange norske skidestinasjonar har brorparten av årsinntektene sine i mars og april, men opplever no at marknaden har falle heilt bort.

No skal Stortinget i samarbeid med regjeringa snikre ei ordning spesielt for desse bedriftene.

– Det har vore noko av det viktigaste for meg å bidra til det. Krisa råkar hardt for ein del bedrifter og lokalsamfunn. I Trysil er 30–40 prosent av alle tilsette permitterte, seier Vedum.

I utgangspunktet har ikkje Stortinget plussa på ordninga i kroner og øre, etter det NTB forstår.

Meir hjelp til olje- og gassnæringa og leverandørindustrien har òg vore eit tema i forhandlingane. Oljenæringa er ramma at eit stort oljeprisfall som følgje av koronakrisa.

(©NPK)