Røde Kors vaskar handlekorger for å tena pengar

Sidan varekøyringsinntektene forsvinn i påsken, stilte Rema 1000 opp med eit alternativt oppdrag til hjelpekorpset.

Ein kunde som er ferdig med påskehandelen og har sett varene i bilen, trillar den tomme handlekorga mot korgskuret. Der ventar Vilde Raunholm Linga og Maiken Kyrkjeeide Neteland med vaskefille og desinfiserande middel. Fyrst når handtaket på korga er vaska, er korga klar for ein ny kunde.

Hengde seg på

Regiondirektøren i Rema 1000 fekk til eit samarbeid med Røde Kors og inviterte butikkane til å delta, fortel kjøpmann Lars Åge Berge ved Rema 1000 i Norheimsund. Butikken og kundane får hjelp til å unngå smittespreiing. Røde Kors får kjærkomne inntekter i ei høgtid der koronatiltaka set ein stoppar for varekøyring til hytter.

Vel 10.000 kroner får Norheimsund Røde Kors hjelpekorps for å hjelpa til tysdag og onsdag. Kostnaden vert dekt delvis av butikken og delvis av Rema 1000 sentralt.

To personar er på vakt, og kvar vakt varar i 4,5 timar. Maiken og Vilde nyttar ledig tid til å pakka poteter og appelsinar, pluss at dei vaskar også handkorgene om lag ein gong i halvtimen.

– Vert det stor pågang og altfor mange kundar i butikken, skal me be folk venta litt og halda avstand, fortel Vilde.

– Det avlastar oss, slik at me kan konsentrera oss om vaskinga inne i butikken. Me hadde vaska korgene uansett, men då hadde me samla dei opp og vaska dei når det er trong for nye, fortel Berge.

Han seier symbiosetiltaket gjev kundane tryggleik og at tilbakemeldingane frå dei handlande er gode.

– Dette viser at me tek tiltaka alvorleg, seier han.

Litt att og fram

Berge fortel at han kjøpte inn fire tusen par plasthanskar då fyrst det vart tilrådd å bruka hanskar i butikkane. Dessutan vart smågodtsalet stengt etter råd frå Kvam herad. Så kom andre nasjonale føringar, så no er hanskane borte og smågodtsalet ope. Enkelte kundar ynskjer likevel å nytta hanskar når dei handlar, og får sjansen til det, og smågodtsalet er på langt nær så stort som til vanleg i påsken, fortel Berge.

Han merkar elles på varesalet at folk er mykje heime. Til dømes går det ein god del meir snacks enn normalt.

– Folk vil kosa seg, konstaterer han.

Mogelegheita til å halda avstand i daglegvarebutikkane har vore diskutert dei siste vekene. Særleg ved kassane vert kundane oppmoda om å ikkje koma for nær einannan.

– Folk er flinke til å halda avstand. Me opplever at det går fint, seier han.

– Kva er den beste tida å handla på?

– Alt er snudd på hovudet no. Vanlegvis er den siste dagen før høgtidene den store handledagen, og det er gjerne frå klokka 12 til 17 det skjer, men folk har vorte flinkare til å fordela seg. Me har hatt tre kassar i gang før klokka 9, og i går trur eg me hadde over 40.000 i omsetning i timen frå 20 til 21. Det er veldig uvanleg, seier Berge.

Hans generelle inntrykk er at folk i distriktet både er meir fornuftige med tanke på smitte og meir tolmodige enn folk i meir urbane strok. Dessutan stel dei mindre.

– Eg trur me har teke tre personar for steling på ti år. Dette er ein veldig hyggjeleg stad å driva butikk på, seier Berge.

25 prosent nedgang

Vanlegvis er spesielt onsdagen og laurdagen i påskeveka svært hektiske dagar for både Rema 1000 og andre forretningar, men Berge reknar ikkje med normal pågang ettersom «hytteforbodet» hindrar mange i å vera på Kvamskogen fram til 20. april. Då HF var innom vel klokka 9 onsdag, var det ein del kundar i butikken, men framleis rikeleg med ledige parkeringsplassar.

Berge fortel at omsetninga i «palmeveka», altså førre veke, faktisk var høgare i år enn i fjor.

– Det hadde me ikkje trudd, seier han.

Kjøpmannen reknar med ein nedgang i omsetninga på «berre» 25 prosent denne veka. Med tanke på at Kvamskogen har godt over to tusen hytter, er nedgangen liten, meiner han.

– Når ein tenkjer på kor mange som har store problem i desse tider, er det me mistar, bagatellar, seier han.

Han trur noko av nedgangen kan skuldast at ein del kundar ynskjer å handla i litt større butikkar med meir armslag i perioden med koronatiltak.