Reiselivsnæringa vil ha midlar til utanlandsk marknadsføring
Reiselivsnæringa håpar tyske turistar kan redde seinsommaren, men manglar midlar til å profilere bedriftene sine i utlandet.
– Tyskarane kan bidra til å fylle kassa for store delar av norsk reiselivsnæring. Men då må regjeringa snarast snu seg rundt og bidra med marknadsføringsmidlar, seier direktør Richard Grov Alexandra og Loenfjord i Loen til Dagens Næringsliv (DN).
Fredag blir det klart om Noreg opnar grensene til Tyskland og andre europeiske land. Men Innovasjon Noreg manglar midlar til å promotere Noreg om det skulle bli lettingar i reiserestriksjonane. Regjeringa har nemleg tidlegare kutta løyvingane til Innovasjon Noreg frå nær 230 til 178 millionar kroner for 2020
Artikkelen held fram under annonsen.
– Vi har rundt ein million vi skal bruke i Tyskland for å signalisere at vi er her. Vi har inga moglegheit til å gjere noko ekstra utover det. For utfordringa i år er jo at bidraga frå reiselivsnæringa er borte på grunn av den vanskelege situasjonen aktørane er i. Dermed blir den samla slagkrafta betydeleg svekt, seier Bente Bratland Holm, reiselivsdirektør i Innovasjon Noreg, til avisa.
Næringsdepartementet har etter det DN forstår tinga ei statusoppdatering for reiselivet frå Innovasjon Noreg innan 10. august.
– Då er det for seint. Næringsministeren burde heller bruke ein halv time i dag på å sette seg inn i status og så løyve pengane med det same, seier Grov på Hotel Alexandra.
