Ståle Brandshaug i Visit Sognefjord var blant reiselivsaktørane som torsdag kom med innspel til næringsministeren for korleis reiselivet best kan klare seg gjennom koronakrisa. – Vi må få på plass tydelege reiseråd for fritidsreiser, arrangement, kurs og konferansar. Vi må vite nøyaktig kva tid folk kan bevege seg og korleis bedriftene best kan rigge seg for å ta i mot gjester, seier han. Her er han under eit møte i Næringsdepartementet tidlegare i år. Foto: Anne Sigrid Hundere
Reiselivsnæringa ber næringsministeren om klare retningslinjer
– Vi kom med innspel som kan hjelpe næringa både på kort og lang sikt. Det første som må komme på plass, er ei avklaring om kva typar fritidsreiser folk kan gjere i 2020, seier Tom Anker Skrede, reiselivssjef i Destinasjon Ålesund Sunnmøre, til Nynorsk pressekontor.
Han var ein av i alt elleve representantar frå norsk reiseliv som torsdag gav nærings- og fiskeriminister Iselin Nybø innspel til korleis departementet best kan hjelpe den hardt råka næringa ut av krisa. Også fleire av dei andre aktørane på møtet tok til orde for raske avklaringar.
– Vi må få på plass tydelege reiseråd for fritidsreiser, arrangement, kurs og konferansar. Vi må vite nøyaktig kva tid folk kan bevege seg og korleis bedriftene best kan rigge seg for å ta i mot gjester. Det må komme på plass raskt, seier reiselivssjef Ståle Brandshaug i Visit Sognefjord, som òg deltok på møtet.