Innfører regionale smitteverntiltak i fleire kommunar i Vestland

For å få ned smitten i Vestland, har regjeringa innført regionale tiltak i Kvam. Mellom tiltaka er munnbindpåbod og krav om bordservering.

Tiltaka gjeld også i kommunane Alver, Askøy, Austevoll, Austrheim, Bergen, Bjørnafjorden, Osterøy, Modalen, Samnanger, Vaksdal, Voss og Øygarden.

– Det er stor pågang av pasientar og høge tal på sjukmeldingar og anna fråvær i helsetenestene både i kommunane og på sjukehusa. I tillegg er sjukehusa i regionen i gul beredskap. Situasjonen er svært utfordrande. Derfor set vi i verk tiltak her no, seier helse- og omsorgsminister Ingvild Kjerkol (Ap).

Desse tiltaka, som gjeld frå fredag 3. desember klokka 21 og gjeld inntil vidare, vert innførte.

* Påbod om bruk av munnbind der det ikkje er mogleg å halde minst ein meters avstand i butikkar, kjøpesenter, kollektivtransport og taxi.

* Påbod om at arbeidsplassar der heimekontor er mogleg utan at det går utover viktige og nødvendige tenester, skal sørgje for at tilsette jobbar heimefrå i heile eller delar av veka.

* Maksimaltal for private arrangement innandørs: inntil 100 personar på offentleg stad eller i leigde eller lånte lokale.

* Plikt for serveringsstader og arrangørar til å ha system for å registrere gjester og for å varsle gjester om smitteeksponering.

* Krav om bordservering av alkohol for serveringsstader og arrangement med skjenkjeløyve.

* Krav om sitjeplassar for serveringsstader med skjenkjeløyve. Det kan maksimalt vere 600 i publikum på innandørs arrangement utan faste tilviste plassar.