Rapport: Mobilfrie skular har hatt ein positiv effekt på skulemiljø

– Å ta bort mobilen åleine løyser ikkje mobbing, og det er framleis altfor mange elevar som ikkje har det bra på skulen. Derfor må vi halde fram det viktige arbeidet med å skape trygge og gode skulemiljø, seier kunnskapsminister Kari Nessa Nordtun i ei pressemelding.

I rapporten kjem det fram at elevkulturen har endra seg dei siste åra, som er prega av mellom anna hardare språk og digital press.

– Det er mange lærarer, miljøarbeidarar og skuleleiarar som står i dette kvardag. Dei jobbar knallhardt for at barna våre skal ha det trygt og godt på skulen, seier Nordtun.

Eit av det mest verknadsfulle tiltaka

– Lærarar og foreldre over heile landet fortel at elevar som finn kvarandre i friminutta, og om ein skulekvardag med meir ro. Når mobilen blir lagt bort, blir det meir leik, sterkare fellesskap og mindre usunt press, seier Nordtun.

Etter initiativ frå kunnskapsministeren, kom det i februar 2024 nasjonale tilrådingar som slår fast at mobiltelefonen skal ut av klasseromma i både grunnskulen og vidaregåande skule, og at friminutta bør vere mobilfrie på barne- og ungdomsskulen.

– Eg er oppriktig glad for at vi har teke mobilen ut av klasseromma – for mange elevar har det betydd eit heilt nødvendig pusterom og ein tryggare skulekvardag, seier Nordtun.

Foreldra speler ei viktig rolle

– Vi som foreldre må følgje med. Vi kan ikkje overlate det digitale livet til barna til skulen åleine. Heldigvis opplever eg det skjer ei haldningsendring no og at foreldra går saman og lagar felles reglar, meiner Nordtun.

Mobbing og utestenging på fritida blir ofte drege med inn i skulekvardagen, påpeikar direktør Morten Rosenkvist i Utdanningsdirektoratet.

– Derfor er det viktig at foreldra blir kjende med kvarandre og barna, og at lærarar og foreldre deler informasjon og samarbeider om å fremje eit inkluderande og positiv fellesskap mellom elevane, seier Rosenkvist.

(©NPK)