– Har tilknyting til hendinga

Vest politidistrikt opplyser i ei pressemelding at politiet har starta etterforsking etter ulukka.

5-åringen var på utflukt med barnehagen då uhellet hende. 17 barn og fem tilsette i ein utanbygds barnehage var på overnattingstur.

Det er ifylgje politiet gjort undersøkingar på åstaden, og tilsette i barnehagen er avhøyrde. 

Ein tilsett i den aktuelle barnehagen har fått status som mistenkt i straffesaka. Personen hadde ansvar for barnet og er mistenkt for brot på straffelova paragraf 280 for aktlaust å ha medverka til betydeleg skade på kropp og helse, heiter det i pressemeldinga.

Påtaleansvarleg Marcus Østgård Monsen seier at hendinga skjedde om morgonen etter at barnehagen hadde overnatta i ein einebustad.

— Det framstår som at eit barn har falt ut av eit vindauge i andre etasje. Barnet vart funne på bakken av tilsette i barnehagen, seier Monsen.

Ambulanse vart tilkalla og barnet vart frakta til sjukehus med luftambulanse. Ifylgje Monsen rykte politiet ut, og starta undersøkingar for å finna ut om det var grunn til å etterforska ulukka som ei straffesak. 

På bakgrunn av avhøyr og undersøkingar er ein tilsett i barnehagen vurdert som mistenkt for å ha handla aktlaust i samband med ulukka, fortel han.

– Årsaka til at det er denne tilsette som er mistenkt, er at det er vurdert at vedkomande har tilknyting til hendinga, seier Monsen.

Han opplyser at det førebels ikkje er andre mistenkte i saka.