Politiet ber føresette om å ta grep:
– Har ikkje råd til å mista nokon

Garen jobbar mellom anna med førebyggjande arbeid, og er uroa over utviklinga politiet ser i trafikken. Politiet får jamleg meldingar om bråk på kvelds- og nattetid, uvørden køyring og unge som tek lite omsyn til mjuke trafikantar og trafikkreglar generelt. Med avgrensa ressursar er det ikkje mogleg å rykkja ut etter alle meldingane som kjem inn.

– Me klarar ikkje å vera til stades overalt, og eg er redd nokon kan koma til å skada seg sjølv eller andre alvorleg om utviklinga held fram, seier Garen. 

Fleire ulukker har allereie funne stad.

– Me har ikkje råd til å mista nokon, understrekar ho.

– Ikkje det me ser

Dei ferskaste trafikantane er ofte dei mest sårbare. Ifylgje Garen er ein oppsving i uvørden køyring nokså vanleg på denne tida av året, men i år opplever politiet at utfordringane er særleg store.

I helga delte politiet ut fleire køyreforbod til unge sjåførar, opplyser Garen. Politiet mistenkjer at køyretøya ikkje var i lovleg teknisk stand og at dei kan ha vore endra utover det køyretøya er godkjende for. 

Skal køyretøya verta godkjende att for bruk att, må dei kontrollerast hjå Statens vegvesen. 

Garen minner om at føresette har ei viktig rolle i å fylgja med på kva ungdomane driv med og korleis køyretøya vert brukte.

– Eg er usikker på kor mykje føresette reflekterer over dette, seier ho.

Føresette må kjenna til korleis køyretøya fungerer og kva reglar som gjeld. Eit køyretøy skal ikkje køyrast fortare enn det er registrert og godkjent for, og føraren må ha rett førarkortklasse for å bruka det, presiserer Garen.

– Det er ikkje det me ser. Langt ifrå, seier politioverbetjenten.

– Ikkje lovleg

Mange av køyretøya er konstruerte slik at dei kan stillast om til høgare fart enn dei er godkjende for. Det kan til dømes skje ved hjelp av ein annan nøkkel eller ein brytar som endrar fartsinnstillinga. Sjølv om dette er teknisk mogleg, er det ikkje lovleg å nytta køyretøyet på denne måten på offentleg veg, presiserer Garen.

Politiet oppmodar innbyggjarar om å melda frå om dei ser farleg eller omsynslaus køyring.

– Skriv gjerne ned registreringsnummeret, og ta bilete eller film om det kan gjerast på ein trygg måte. Dette kan hjelpa politiet i det førebyggjande arbeidet, seier ho.

Via registreringsnummeret kan politiet også kontakta eigarar direkte for å ta ein førebyggjande prat.

– Målet vårt er ikkje å gje flest mogleg reaksjonar, men å førebyggja alvorlege ulukker og skadar. Difor oppmodar me både ungdomar og føresette til å ta ansvar og bidra til tryggare ferdsel i trafikken, seier Garen.