– På tide at bøtesatsane på sjøen vart heva

Påska er over og båtsesongen er i gang. Wold Gaulen peikar på kor ulike bøtesatsane på landjorda og sjøen er.

– Det skjer tragiske ulykker begge stader kvart år. Då gir det ikkje meining med eit langt meir ubetydeleg bøtenivå til sjøs, medan bøtene på vegane berre aukar. Sjå berre på mobilbruk i bil. Der har satsane auka frå 1700 kroner til 10.750 kroner på sju år, seier han i ei pressemelding.

Fagsjefen meiner at låge bøtesatsar kan svekkje respekten for regelverket.

– Ei bot på same nivå i 2001 og 2025 kjennest heilt ulikt i lommeboka. Når nivået er kunstig lågt, blir regelbrot opplevd som mindre alvorleg. Bøter som svir er viktig for å førebyggje ulykker, seier han.

Han meiner at dersom bøtene heng langt etter pris- og lønnsutviklinga, så misser dei effekten. Og det går ut over tryggleiken på sjøen, både for dei som køyrer, alle som sit på og alle som møtest der, legg Wold Gaulen til.

Han er misnøgd med at promillegrensa framleis er på 0,8, noko som er fire gonger så høg som i bil.

Dette er endringane:

For ung eller manglar båtførarprøve : Aukar frå 500 og 1500 kroner til 5000 kroner. Aukar til 7500 kroner for båt som krev høgfartsbevis.

Køyring over fartsgrense : Aukar frå 1500 kroner til 5000 kroner.

Manglande bruk av vest : Aukar til 900 kroner per person.

Manglande eller mangelfulle lanterner : Aukar frå 2000 og 1500 kroner til 5000 og 4000 kroner.

Fellesbot : Maksgrensa aukar frå 5000 til 15.000 kroner.

(©NPK)