Oppmodar hundeeigarar til å vere merksame
Denne veka vart ein hoggorm observert på Askøy utanfor Bergen. Når mildvêret varmar opp bakken, kjem hoggormen fram.
Tysdag denne veka såg Kent Hunskår ein hoggorm på Askøy, skriv Bergens Tidende. Hunskår fortel at den låg ein halvmeter frå stien.
– Eg har aldri sett ormen så tidleg på året som no. Første dagen med plussgrader kom han, seier han.
Annonse
Skadesjef for dyreforsikring Kari Beate Stenseth i Tryg seier i ei pressemelding at ein slik observasjon er ei viktig påminning om å vere merksame allereie no.
Tryg skriv at hoggormen kjem fram langs stiar, i lyng, ved steingjerde og i hagar når bakken blir varma opp etter vinteren.
– Hoggormen er ikkje aggressiv, men han kan bite dersom han kjenner seg trua. Hundar er særleg utsette fordi dei snusar og undersøkjer terrenget tett på bakken, fortel Stenseth.
Hoggormbit kan i somme tilfelle vere livstruande for både hund og katt.
Annonse
– Dersom du mistenkjer hoggormbit, skal du kontakte veterinær med ein gong – ikkje vent og sjå an utviklinga. Rask behandling kan vere avgjerande for utfallet, seier Stenseth.
(©NPK)
