Opnar armane for «soveskatten»

Kvemmingane stilte seg i mars bak framlegget til ei positiv fråsegn om ei forskrift om overnattingsavgifta eller «turistskatten». Hardangerrådet har forma fråsegna på vegner av kommunane. Bakteppet er lova om besøksbidrag som vart vedteken i fjor.

Eit mindretal med Frp i bresjen ville motsetja seg ordninga. Også i Eidfjord fekk fråsegna støtte, der av alle så nær som éin representant.

Også i Ullensvang kommunestyre vart det fleirtal for å støtta fråsegna, men etter framlegg frå Robin Tveit (Frp) peikar kommunen på at det kan gje utilsikta utfordringar i pressområde at såkalla villcamping fell utanfor ordninga. Kommunen tok til orde for supplerande verkemiddel og betre høve til å motverka uregulert camping. 23 av 33 støtta Tveit. Mellom andre ordførar Roald Aga Haug (Ap) røysta mot.

Splitta ulvikjer

Også i Ulvik herad var dei folkevalde delte i synet på avgifta då formannskapet drøfta saka 15. april. Det delte ordførar der og rådsordførar i Hardangerrådet, Jens Holven (Sp), då rådet tok saka opp i eit møte i Norheimsund 27. mars. 

To av fem i formannskapet – frå Ap og H – røysta mot fråsegna. Dei lanserte ikkje ei alternativ fråsegn.

Holven påpeika at kommunen har sterke folk i bransjen som meiner noko om saka. Desse meiner mellom anna at det er urimeleg å påleggja hotella å leggja ei avgift på tre prosent på toppen av det turistane har betala for rom som allereie er tinga til dømes i 2027. Kanskje må verksemdene forskotera desse summane, påpeika rådsordføraren.

Dagleg leiar Ann Irene Myrheim påpeika at dette problemet vil gjelda berre i ein overgangsfase.

– Som i andre land

Kommunedirektør Thore Hopperstad i Ulvik påpeika i hardangerrådsmøtet at det kan verta vanskeleg å administrera den nye ordninga, sidan prisane er dynamiske særleg på hotella. Ein fast kronesum vil gjera det enklare og meir føreseieleg, sa han på vegner av næringslivet i Ulvik.

Ordførar Roald Aga Haug (Ap) påpeika at ei løysing med ein fast sum vil slå hardare ut for eit billeg rom i distriktet enn for eit dyrt rom i byen.

Timo Knoch (Ap) meiner det vert feil å leggja avgifta på campingplassane, med tanke på utfordringa som frå før finst med «villcamping». Elles meiner han at avgifta bør kunna fungera i Noreg på lik line med andre land i Europa.

– Kvifor skulle det ikkje fungera i Noreg? spurde han.

Ifylgje Knoch er innkrevjinga organisert på ulike måtar. Somme stader vert pengane henta inn saman med pengane for overnattinga, medan ho andre stader må betalast som eit eige tillegg.

– 99,99 prosent

Holven undra seg over om det er gjeve at Hardanger vil verta definert som eit pressområde, som er eit kriterium for å få innføra avgifta.

– For å seia det slik: Eg er 99,99 prosent sikker på at Ullensvang er kvalifisert. Eg vil tru at dei andre kommunane òg er kvalifiserte, sa Haug.

Også Knoch kjenner seg trygg på at Eidfjord kjem til å stetta krava, og viste til at toleevneanalysar kjem til å underbyggja det. Det ser ut til at kommunale sjølve må argumentera for at dei er pressområde.

Myrheim påpeika at kommunane må laga ei tiltaksliste som syner kva pengane skal brukast til, og at denne lista må godkjennast av styresmaktene.

– Ein må vera ganske edrueleg i kva ein definerer som problem og kva pengane skal brukast til, sa ho.

Ho minte om at det er opna for å sjå område som ein region med stort press frå turismen, slik det er gjort i Lofoten. Pengane kan brukast mellom anna til skilting og merking for å få bukt med villcamping. Også skyttelbussar til populære stader kan vera eit aktuelt tiltak, opplyste ho.

– Hardanger er eit pressområde når me ser på den infrastrukturen me har, sa ho.

Samlar krefter og kroner

Hardangerrådet vedtok i det same møtet, 27. mars, å gje administrasjonen i rådet og dei kommunale næringssjefane mandat til å utarbeida ei sams sakshandsaming. Denne skal liggja til grunn for den vidare lokale saksutgreiinga av besøksbidraget etter at forskrifta som var på høyring til 7. april, eventuelt er vedteken. 

Dei skal ifylgje vedtaket greia ut både ein kommunal og ein regional del når «turistskatten» eventuelt skal setjast ut i praksis, tidlegast frå og med 2027. Lova opnar for interkommunalt samarbeid og regionale løysingar.

Lokalt kan «soveskatten» nyttast til toalett, turstiar, renovasjon, informasjonsverksemd, skilt og vedlikehald av bygg og infrastruktur med stor turistslitasje. Regionalt kan til dømes felles transportløysingar, besøksstyring, digitale trafikkdata og sams stiinfrastruktur finansierast med pengane.

10. april fekk Hardangerrådet og Sunnhordlandsrådet orientering av Gaute Wahl i Lofotrådet om korleis rådet arbeidet med ein regional modell for besøksforvalting og bruk av besøksbidraget.