Politiet etterforskar funnet av ein død person i sjøen like nord for Svåsand i Ullensvang. Det skreiv Hardanger Folkeblad tysdag 16. juni.
Personen vart funnen i fjæresteinane av privatpersonar som varsla politiet om føremiddagen måndag 15. juni, seier politistasjonssjef Øystein Torsnes ved Hardanger politistasjon.
Annonse
Ein patrulje rykte ut til staden. Personen skal ha bore preg av å ha lege lenge i sjøen.
– Me har no oppretta ei undersøkingssak, og personen vil verta obdusert. Målet er å finna ut kven personen er, og om det har skjedd noko straffbart, seier Morten Fosse, straffesaksansvarleg ved Hardanger politistasjon, til oddabladet.
Torsnes seier til HF at personen er umogleg å identifisera. Politiet kjenner førebels ikkje til personar som er sakna i nærområdet i nyare tid. Torsnes vonar DNA eller andre funn kan seia noko om kven det er eller kvar personen kjem frå. Det er ikkje mogleg å slå fast kjønnet til den avdøde.
– Det er vanskeleg å seia kor lenge personen har lege i vatnet. Det har iallfall gått veker, seier han.
Annonse
Ifylgje politioverbetjent Bodil Nakkerud ved Hardanger politistasjonsdistrikt gjev ikkje den førebelse obduksjonsrapporten meir informasjon.
– Me har fortsatt ikkje funne ut kven kroppen tilhøyrer. Men det er sikra prøvar for å henta ut DNA. Då vil ein kunna finna identiteten om ein har registrert DNA frå sakna personar, seier ho.
