Nytt oppdrag til Fjellstrand

Det opplyste kjøparen og leverandøren i ei pressemelding onsdag ettermiddag. Verftet på Omastrand er stolt over og glad for å verta vald. 

Ifylgje salssjef Olav Lie vil oppdraget truleg halda opp mot 40 tilsette i arbeid dei neste to åra. Det fyrste halve året vil det vera mest ingeniørarbeid internt. Bygging av skroget vil etter planen byrja like før jul. 

Kor stort oppdraget er i kroner, vil ikkje salssjefen uttala seg om. 

– Det me kan seia, er at det er ein kontrakt til marknadspris, seier Lie.

Sidan Fjellstrand leverte hurtigbåten «Medstraum» for 2,5 år sidan, har det stort sett vore ombygging av eksisterande båtar som har gått føre seg på verftet. Det har vore – og er – god aktivitet, men dette er det fyrste nybygget på fleire år. Slik sett var det veldig velkome med eit slikt oppdrag no, seier Lie. 

– Har de andre spanande prosjekt på gang? 

– Ikkje noko som er skrive i boka, men me føler me er i ei spanande tid kor me kan landa fleire prosjekt. Det ser lyst ut, seier salssjefen. 

Den nye ferja skal ha lågt energiforbruk vera tilpassa optimal og miljøvenleg drift. Fartøyet skal gå i trafikk i sambandet Breistein–Valestrand frå 29. november 2027. Ho skal ha ein kapasitet på 50 bilar, ifylgje pressemeldinga. Kontrakten Gulenskyss har med Skyss om ferjedrifta, gjeld i 15 år.