Ny oppdaging om lakselus, temperatur og smitte
Forskarane har lenge visst at lakselus smittar lettare ved høgare temperatur i vatnet. No har dei også funne ut at temperaturen har mykje å seia for talet på lakselus.
– Vi såg ein sterk samanheng mellom vasstemperatur og infisering. Dess varmare vatn, dess betre for lusa, seier forskar Sussie Dalvin ved Havforskingsinstituttet i ein omtale på nettsidene til instituttet.
Forsøk Dalvin og kollegaene hennar ved Havforskingsinstituttet har gjort, viser at laks i vatn med ti grader fekk dobbelt så mange lus som laks i vatn med tre grader.
Artikkelen held fram under annonsen.
Ifylgje Dalvin fortel forsøket mest om lusesmitte vinterstid. Ho legg til at saltinnhaldet i sjøen og overlevinga til larvane også har mykje å seia for kor mykje smitte laksen får.
Dalvin peikar på at høgare sjøtemperatur betyr at larvane kan veksa opp raskare.
– Då blir dei kjønnsmodne og kan sjølve produsera nye larvar. Med andre ord ser vi no at dei får dobbel bonus i varmare vatn, seier Dalvin.
