NVE: – Pass opp for ras
Påsken nærmar seg og mange skal på tur i fjellet. Då er det viktig å skjøna kor det kan gå ras.
NVE (Noregs vassdrags- og energidirektorat) oppmodar i ei pressemelding folk til å vera varsame i fjellet i påsken. Trass i at det er mindre snø enn normalt, åtvarar dei mot ras.
– Legg du turen utanom skredterreng, unngår du også å utsetja deg for snøskredfare. Kvikklunsj og appelsin smakar like godt i slakare terreng, seier vaktleiar i Snøskredvarslinga, Emma Julseth Barfod.
Annonse
Skredterreng omfattar terreng som er bratt nok til at det kan losna skred, og område som kan verta trefte av skredmassar.
Om ein likevel planlegg tur i skredterreng, er det viktig å ha oversikt over kor stor faren er. Det kan ein gjera på Varsom.no. Der publiserer NVE, i samarbeid med vegvesenet og Meteorologisk institutt, daglege varslingar.
– Morgondagens varsel vert publisert innan klokka 16 dagen før, seier Julseth Barfod.
(©NPK)
