No er det bålforbod i heile landet

Frå 15. april til 15. september er det generelt forbod mot open eld i skog og utmark over heile landet, med unntak av godkjente bålplassar. Det er likevel tillatt å gjere opp eld der det openbert ikkje kan medføre brann.

– Bålreglane opnar for bruk av skjønn. Du kan tenne opp bål i tilfelle kor det ikkje openbert kan medføre brannfare. Det kan for eksempel vere der det framleis er mykje snø, etter mykje nedbør, eller på sand, i god avstand frå vegetasjon, seier Lasse Heimdal, generalsekretær i Norsk Friluftsliv, i ei pressemelding.

– På grunn av koronaviruset og den spesielle tida vi er inne i, tilrår vi sterkt å følgje råd og pålegg når det gjeld bål, eingongsgrillar og eld utandørs. Ein skogbrann er svært krevjande, og er ikkje ei ekstrabelasting brann- og redningstenester treng no, seier han.