Naturvernforbundet reagerer på snøskuterforslag frå Sp

Senterpartiet vil at kommunar i større grad kan bestemme om dei vil lage snøskuterløyper. Naturvernforbundet reagerer på forslaget, og meiner det vil gå utover naturområde.

– Friluftslivet har vorte så til dei grader overkøyrt av snøskuterløyper, seier Christian Børs Lind, rådgivar i Naturvernforbundet, til NRK.

Naturvernforbundet meiner at å gi meir makt til kommunane, kjem til å føre til fleire snøskuterløyper i friluftsområde. Børs Lind minner om at tre av fire snøskuterkommunar vel å leggje løyper i viktige friluftsområde.

Motorferdselslovas forbod mot fornøyelseskøyring vart oppheva i 2015. Etter det gjekk talet på kilometer skuterløyper til privat bruk opp frå 0 i 2015 til 2.500 i 2020. Ein rapport frå Norsk institutt for naturforsking (Nina), viser at mange av desse snøskuterløypene går gjennom sårbar natur og friluftsområde.

Stortingsrepresentant Sandra Borch (Sp) seier at målet med lovendringa er å redusere byråkratiet, og å flytte makta frå Oslo til snøskuterkommunar.

– Dette er ikkje snakk om noko frislepp. Det er snakk om å gi kommunane og lokale avgjerdstakarar meir makt i desse sakene. Det kan både føre til strengare og mildare regelverk, seier stortingsrepresentant Borch til NRK.