Feil kode vart nytta i skjerminga av to dokument i postlista til Kvam herad i januar.
Ragnhild Økland Børven
Namn på avvegar
Det kjem fram i ei avviksmelding frå heradet til Datatilsynet. Avviksmeldinga opplyser at to brev med tittelen «Arbeidskontrakt for varig tilrettelagt arbeid i ordinær verksemd» vart journalførte på feil måte.
Breva vart skjerma for innsyn, men både tittelen og namnet på mottakarane var synlege i den offentlege postlista. Det skulle dei ikkje ha vore. Namn på mottakarar av slike brev avslører ei helseutfordring eller andre personlege forhold, skriv arkivleiar Trude Birknes Buene i avviksmeldinga.
Kvam herad vart merksam på feilen då ein tilsett i Nav gav beskjed. Namna vart fjerna med det same, men hadde då vore tilgjengelege for ålmenta i 26 timar. Det er uvisst om andre enn den tilsette i Nav har sett namna i postlista, skriv heradet.